انفراد: أول حوار لـ"الفيلسوف" بعد التراجع عن الترشح فى انتخابات الزمالك

بقلم :   

الجمعة, 14 فبراير 2014, 13:04 مساءً - القاهرة
انفراد: أول حوار لـ


أخبار أخرى
مدحت عبد الهادى: الزمالك فى حاجة الى هذا الثنائى .. ولهذه الاسباب حسين الشحات لا يلح للزمالك
خاص : المصرى يطلب كابوريا وازمة كبرى تهدد انتقالة اليه
اعصار صلاح يضرب اوربا من جديد
مدحت عبد الهادى يكشف كواليس استقالة ثلاثى الجهاز الفنى
بالصور : الزمالك اليوم كان أول من طالب بالافراج عن جمهور الزمالك
"صورة" عمر جابر يهنئ جمهور الزمالك المفرج عنه
بركات يبحث الخروج من جحيم الاهلى
خاص : لاعبان جدد على رادار الزمالك
نيمار فى الريال
عبدالله جورج سعد : فى هذه الحالة سأحضر اجتماعات مجلس الادارة
"صورة" تدوينه غامضة لممدوح عباس بخصوص حادثة الدفاع الجوى
رغم الاخفاقات : العروض تنهال على نيبوشا
ابرز احداث مران الفريق استعدادا للاتحاد السكندرى فى سطور
"صورة" عتاب وتهنئة من احمد مرتضى منصور لجماهير الزمالك عقب الافراج عنهم
محمد عواد يفجر مفاجأة: كيف كان أحمد الشناوى سببا فى تراجعه عن الانضمام للزمالك
هو شخص صاحب فكر متطور ومختلف عن أقرانه وسابقيه، لم يلقب بـ"الفيلسوف" بمحض الصدفة وإنما نتيجة قدرات فكرية مميزة ومختلفة وقادرة على أن تدير بأسلوب يجمع المرونة والقوة، الهدوء والحسم، الإقناع والحزم، هو أيمن يونس عضو مجلس إدارة الزمالك.

يونس لم يكتف بأن يكون لاعبًا مميزًا فى الزمالك صاحب تاريخ كبير من البطولات والإنجازات، وإنما أصر على أن يكون إداريًا رائعًا ربما فاجأ جماهير الزمالك بإدارة مختلفة ومميزة لفريق الكرة، يتدخل وينهى أزمات ويحاول توفير كافة سبل الاستقرار للجهاز الفنى واللاعبين حتى تكون الأجواء مهيئة لتحقيق مايريده الجمهور وهو الفوز.

"الزمالك اليوم" حرص على أن يجرى حوارًا خاصًا مع يونس وهو الأول بعد موقفه فى الانتخابات بتقديم أوراقها ثم سحبها قبل تحويلها للجهة الإدارية، فتح فيه قلبه، وأفصح عما فى عقله، وأطلق العنان لصراحته وصدقة فى الحديث عن أمور هامة داخل القلعة البيضاء:

فى البداية آثار موقفك فى الانتخابات جدل كبير .. وأكيد ليك تعليق ؟

- اللى بيخشوا الانتخابات 3 أنواع، نوع واثق فى نفسه وقدراته وإنه يقدر يمر بالمرحلة الصعبة فى نادى الزمالك، ونوع داخل يتلمع على الكرسى ويتشهر، ونوع داخل يلاقيله أى فرصة عمل أو أى حاجة، الزمالك ميتحملش غير النوعية الأولى، بعدما ما انسحبت بتمنى الانتخابات تتأجل، لو اتأجلت هقدر أعدى بنسبة 70 أو 80% من حلمى لفريق الكرة فريق بطل قوى يقدر ينافس على البطولات، خلاص أنا هعرف أخدم الزمالك أنا دخلت النادى وعرفت عيوبه ومش هسيبها، ومش هسمح لحد مبيفهمش أو مبيعرفش إنه يضايق فرقة الكورة أو الجماهير أو الألتراس، كلنا هنتشارك فى العمل لصالح النادى من دلوقتى، مش مهم أقعد على كرسى علشان يبقالى رأى.



- بس أكيد قبل ماتترشح كنت عارف أجواء الانتخابات فى الزمالك والصراعات اللى فيها ؟

- أنا دخلت الانتخابات علشان أخرج وأدى رسالة، أنا مش مهتم بالانتخابات لكن دخلت أقول للناس خليكوا أد المكان، أنا عاوز حد عنده برنامج ورؤية وقدرة على التعامل مع المستقبل، بالتوفيق لكل المرشحين لكن مكدبش عليك أتمنى الانتخابات تتأجل.



- وهل تلقيت اتصالات من مسئولين أو مرشحين أو لاعيبة فى الفريق للتراجع والترشح فى الانتخابات ؟

- حتى لو حصل الموضوع خلاص، فى لاعيبة وزملاء بيكلمونى، لكن أنا عارف بعمل إيه، وقد أكون أقوى وأنا بره الانتخابات، أنا إنسان صعب تلوى دراعه وتقوله اسمع كلامنا عشان ننجحك فى الانتخابات، إنما اللى أقدر أقولهولك إن فعلًا فى زمايل كتير كلمونى وعائلات فى النادى، إحنا اتعلمنا المشى فى نادى الزمالك، ده بيتى بجد، 60 أو 70% من اللى وعدت أعمله أنجزته بشكل مقبول جدًا، عملت انضباط مع اللاعيبة مفيش كدب ولا لف ودوران بنلتزم بكلامنا وأفعالنا، رجعنا كلمة نادى الزمالك، أنا بحاول أرجع الكواليتى بتاع لاعيبة نادى الزمالك ومعايا الجهاز الفنى اللى فاهم إننا عاوزين نعمل إحلال وتجديد وتطوير للآداء، أنا مش بسابق الأهلى لكن بسابق الفرق الأفريقية وإن الزمالك يرجع رقم واحد فى أفريقيا، فى احترام وأدب وحب وانتماء فى الفريق، ومعانا جهاز فنى أكثر من رائع وميدو بيقدم حالة مختلفة تمامًا والمدربين بدأوا يقلدوه وأصبح صيحة وأصبح موضة فى طريقة اللعب.



- ليه دايمًا الزمالك حيطة مايلة؟

- إحنا اللى عملنا نفسنا حيطة مايلة، إحنا الزملكاوية اللى بنتخانق مع بعض وبنهين بعض، محدش محتاج يتعب فى نادى الزمالك، اللى طمعانين فى الزمالك بياكلوه، زى مصر بالظبط، نط فيها الطمعانين زى الإخوان و6أبريل لكن إحنا معندناش غير طريق واحد مع راجل واحد هو المشير السيسى وهنقف معاه لحد مايبقى رئيس البلد دى.

- طب مين الراجل فى الزمالك اللى نمشى وراه ؟

نادى الزمالك محتاج مجموعة والمشير السيسى محتاج مجموعة، لو اتأجلت انتخابات الزمالك أوعدك بمجموعة مفاجأة، لكن أنا اتفاجئت بالانتخابات مكنتش مركز لما اشتغلت فى نادى الزمالك غير فى إنى أعمل كل يوم حاجة لحد ماقالولى آخر يوم النهاردة الساعة 5 فقررت أخش وأخرج عشان أبين إن مش فارق معايا، أنا عمرى ماشتغلت انتخابات فى الزمالك، أنا عايز حد يقول أيمن اشتغل انتخابات فى الزمالك.

- هو مش حضرتك اللى كنت بتقول لكن الغير دائمًا اللى كان بيقول أيمن يونس فى قائمتى أو هينزل معايا الانتخابات ؟

- أيمن يونس لما هييجى هييجى ياريس يانائب ريس، لكن قدمت عضو مجلس إدارة عشان معملش شبهات ويتقال إنه لما اترشح ريس أو نائب حد قاله أخرج، وأنا داخل أدى رسالة واضحة، ونادى الزمالك لازم يتحضر بشكل كويس وأنا بحضر جيل مميز إداريًا تقدر تقود نادى الزمالك بشكل مختلف.

- زى مين كده يا كابتن؟

- مش هتكلم فى اسماء إنما هتقولى حازم إمام هقولك طبعًا وكذلك عمرو الجناينى وأحمد مرتضى منصور وأحمد جلال إبراهيم، وأنا اشتغلت مع مجلس سعيد بيه جدًا، طبعًا فى ناس حبوا ينطوا فى الكورة ويضايقونى واللى وده نفسه لجنة أندية واللى وده نفسه لجنة بث، أنا سبتهم وهما مش فاهمين نصى، لكن خليهم يتلمعوا شوية، وفى الآخر أنا عارف بعمل إيه وشايف الزمالك محتاج إيه وعارف هخدمه إزاى، مش هنسيب حد يضيع نادى الزمالك، ولو حد نجح فى الانتخابات مش هنسيبه يغلط، ولو فى تأجيل للانتخابات النادى هيبقى أكثر استقرارًا.



- حضرتك قولت إن لو الانتخابات اتأجلت هتجهز قائمة تنزل بيها، ليه الفكرة مجتش لحضرتك قبل الانتخابات ؟

- كنت بشتغل مش فاضى، كان عندى لاعيبة كورة عندها خلافات ومشاكل كتير، الموضوع مكانش سهل، النهاردة بنشوف اللاعيبة نازلة التمرين مبسوطة وبتجرى على التمرين وتحديات بين اللاعيبة على المكان الواحد، زمان كانت اللاعيبة بتنزل متضايقة واللاعب يقولك اللى يلعب يلعب أنا مش عاوز ألعب.



- ليه مشاكل الزمالك مادة خصبة جدًا للإعلام ؟

- من عند ناس كتير بتتكلم وملهاش حق وبتثير المشاكل وناس مبتعرفش تتكلم وغاوية تتكلم وتوصل الكلام للناس وبيتكلموا، أما عملنا ملفات فى مجلس الإدارة الموضوع بقى أحسن وعلاقتنا اتحسنت بالصحفيين  والإعلاميين والمجتمع جوه النادى، زى موقف صلاح سليمان لما رمى الفانلة حليناه فى وقتها، دور الصحافة والإعلام والمواقع دور مهم ومحترم وأنا مقتنع بالشباب اللى بيشتغلوا فى المواقع لإنهم بيأدوا رسالة، لإنكوا مش بس بتنقلوا على الخبر لكن بتحافظوا عليه وبتحافظوا على حقيقة علاقة الرياضيين بالمجتمع المتابع لهم.



- ليه دايمًا فى أشخاص فى إدارات الزمالك بتعمل لمصلحتها أكتر مابتعمل لمصلحة النادى ؟

- ميهمنيش كل واحد بيعمل إيه، عاوزين نشوف الجزء الإيجابى، مش عاوزين نشوف مين وحش لكن شوفوا مين كويس، ده اللى احنا محتاجينه وياريت نفكر بالطريقة دى.



- ليه دايمًا الزمالك بينهى علاقته مع أى حد موجود فيه بطريقة مش كويسة، زى الطريقة اللى مشى بيها كابتن حلمى طولان؟

- الكابتن حلمى هو اللى حب كده، مش إدارة الزمالك اللى حبت كده، لإن إحنا اتصلنا بيه وهو رفض الرد، وده لايقلل من احترام الكابتن حلمى طولان ده راجل محترم وكبير وأخ كبير ولايجرؤ أحد إنه يهينه، هو حب الأجواء تبقى كده لإنه زعل لكن ليه كامل الحب والاحترام وهو أساسًا راجل محترم لكن خدها أوى على نفسه ورفض التواصل مع أى حد.



- طب خلينا ندخل فى جزئية فرقة الكورة والصفقات تحديدًا، كان اتقال إن إبراهيم صلاح وصل لاتفاق مع الأهلى، إيه تعليقك ؟

- مفيش حد اتفق مع إبراهيم صلاح دى إشاعات ده ابن نادى الزمالك وفى اتصال مباشر معاه ومتفقين أنا وهو وخلال وقت قريب هنصل معاه لاتفاق.



- وميدو اتكلم مع حضرتك فى صفقات أو مراكز معينة ولا لسه ؟

بيحصل كلام بس على خفيف متقطع بنتكلم بس لسه هنشوف الأمور هتمشى إزاى.



- ميدو قبل مايتعين كان ليه تصريحات بإنه قبل ماتتاخد قرارات بخصوص فريق الكورة أو اللائحة لازم تتشكل لجنة الكرة عشان الكل يشارك فى القرار؟

-  قال كده إمتى، لو انت بتأولوا بقى دى حاجة تانية.

- الكلام ده فى التليفزيون ومسجل ؟

- لا مسجل أنا أعترض على كلامك ومش مصدقه، انت بتتكلم على اللائحة دى كانت بموافقة مجلس الإدارة، ماليش دعوة بالمكافآت دى بتاعة المدير الفنى، اللائحة دى أعظم حاجة اتعملت فى نادى الزمالك، طول عمر اللوائح تضمن حقوق اللاعب بس إنما دى بتضمن حقوق النادى واللاعب، لو انت عاوز تاخد 3 أو 4 مليون جنيه هاتلى على الأقل بطولتين من 4 بتشارك فيهم، أنا عندى لاعيبة مكانتش بتلعب طول السنة وعاوزة عقودها كاملة، إحنا عاملين لائحة بموافقة مجلس إدارة سابق وحالى، بالنسبة لميدو هو قراها واتكلمنا فيها واتناقشنا فيها وقاللى إنها أكثر من رائعة وأنا لقيت أندية كبيرة فى أوروبا معندهاش لائحة بالقوة دى، واللائحة دى اتوافق عليها من كبير العائلة الكروية السابقة الكابتن حماده إمام، هى لائحة قوية لكن فيها ثواب وعقاب، هو فى لائحة معمولة إن اللاعب لازم يعمل أعمال خيرية وإلا يتخصم منه 1%، فى لائحة بتقول إن يتخصم 1.5% لكبار الزمالك، دى لائحة اللى عاوز يلعب فى الزمالك لازم يتعب ويعرق ويجيب بطولات.





- ليه تعاقدنا مع دومينيك سنة واحدة مش 2 أو 3؟

- أولًا هى سنة ونص وانتوا بتقولوا سنتين تلاتة عشان حبيتوه، أنا جبته سنة ونص وليا الحق فى التجديد لو نجح معايا إنما لو منجحش هقوله شكرًا، دومينيك من أول ما الأهلى قالوا مش عاوزينه بنكلمه، أنا عاوز أعيد الاحترام بينى وبين الأهلى مش عاوز التطرف والعصبية إنما لو فى حد متطرف مش هسيبه، دومينيك لما حصل خلاف بينه وبين الأهلى وطلب يمشى كلمته ووافق لكن حلمى طولان قالى أجل الموضوع شوية وأما جه ميدو كلمنى وقالى أنا حابه وعاوز أجيبه قولتله بكرة يكون معاك فى الملعب وحصل فعلًا.



- إمتى الزمالك يرجع للبطولات؟

- قربت إحنا شغالين وفاهمين بنعمل إيه وبنطور فريق الكورة وفكر اللاعيبة، زمان الزمالك فى التمانينات اللى هى أعظم مرحلة فى تاريخ النادى وأعظم فرقة عملت بطولات، الزمالك الفترة الأخيرة دخل فيه لاعيبة عيب إنها تلبس الفانلة، لازم يكون عندى مقومات شخصية لاعب الزمالك، لاعب الزمالك دايمًا فنان وممتع وشخصية وكاريزما، مش مقبول تجيبلى لاعب مش عارف يرمى ثرو أو يعمل فينت أو يتحرك فى مساحة أو مبيعرفش يستلم ويسلم أو مبيشوطش، الزمالك يسير فى الاتجاه اللى احنا حاطينه.



- أخيرًا لو حابب تقول كلمة لجمهور الزمالك؟

- مقلقوش، إحنا عارفين بنعمل إيه وبنشتغل كويس وجبنا جهاز فنى رائع بنطور من اللاعيبة هنجيب لاعيبة مميزة بنطلب منكوا تبقوا أذكيا محدش يغلط ساندونا ودعمونا خلونا نرجع أسرة وعيلة وحبايب ومحدش يوقع بينا وبين جمهورنا أو الألتراس نحافظ على بلدنا ونادينا.

- فى أى حاجة حضرتك كنت حابب تتكلم فيها مسألتش عنها ؟

- بشكرك شرفتنا ونورتنا لكن أنا قعدت 3 أشهر شغال مبنامش بحب وإخلاص لنادى الزمالك، أنا عرفت أجيب كاس مصر لإنى حطيت النقط على الحروف، ظبطنا شخصية وعلاقات ونفسيات فرقة، اللاعيبة حبت التغيير، كان معايا مجلس محترم والمجلس اللى فات كان محترم اللى يفرق بينهم الاحتراف فى الإدارة، هنرجع كلمة نادى الزمالك عقد يحترم، هنرجع اللاعيبة تجرى ورانا عشان تدخل النادى، هنرجع ألتراس يحبنا وينتمى إلينا بشكل كويس، وهنرجع اسم الزمالك كويس.



بنشكرك ياكابتن أيمن وبالتوفيق إن شاء الله

الفيلسوف: أنا بشكرك ونورتنى ..



أجرى الحوار/ كريم عبد المحسن

شاهد الفيديوهات
zamalek fans
التعليقات