خاص بالفيديو .. مرتضى: طموحى رئاسة الجمهورية..ولم أقدم سوى 15% للزمالك

بقلم :   كريم عبد المحسن

الخميس, 27 مارس 2014, 12:13 صباحاً - القاهرة
خاص بالفيديو .. مرتضى: طموحى رئاسة الجمهورية..ولم أقدم سوى 15% للزمالك
ربما لعب اسم مرتضى منصور دورًا كبيرًا فى شهرته، ولم يكن أحد يعرفه بحكم عمله وإنجازاته، لكن ما أن تم تعيينه مع مجلس إدارة الزمالك فى أكتوبر الماضى، حتى بزغ نجمه كعضو شاب نشيط قادر على إنهاء الأزمات وحلها، والحفاظ على حقوق النادى بشكل قانونى، لأن "ابن الوز عوام"، وهنا نتحدث عن أحمد مرتضى منصور عضو المجلس الحالى والمرشح على مقعد العضوية تحت السن، والذى فتح قلبه لـ"الزمالك اليوم" فى حوار متميز:

فى البداية بنرحب بيك .. وعاوزين نسألك عن سبب ترشحك فى الانتخابات ؟

سبب ترشحى إنى قدرت أحقق نجاحات فى فترة تعيينى، وزمايلى فى النادى طالبونى أترشح ونزلت.

وهل فى علاقة بين ترشحك وترشح أ.مرتضى منصور ؟

أنا كنت مش عارف أترشح ولا لا، لكن بعد ما أستاذ مرتضى طلب منى النزول فى قائمته مكانش ينفع منزلش لإنى مقتنع بمرتضى منصور بشكل موضوعى كرئيس نادى وبشكل أبوى، لازم أبقى خادم لنادى الزمالك ولمرتضى منصور.

إيه النجاحات اللى حققتها وشجعتك تترشح ؟

اللى أنا عملته واجب مش إنجازات، أنا عملت الطبيعى، لو اجتهدت أكتر من كده ممكن أطلع أكتر، كان ليا دور فى موضوع شيكابالا كان ماشى بـ100 ألف دولار، أنا جبت 5 مليون و200 ألف جنيه من بيعه، بالإضافة لـ5% من أى تعاقد يتم بعد كده بين اللاعب وأى نادى تانى، قللت اللى النادى كان المفروض ياخده شيكابالا، حصلت حوالى 6 ملايين جنيه من مديونيات النادى، 2 مليون مديونيات مباشرة جوه النادى و4 ملايين من المحلات اللى بره، رجعت 5 محلات للنادى كان بقالهم كتير ضايعين، من ضمنهم محل نزلت فتحته بإيدى وصاحبه قاللى خده هدية ليك وللمستشار، أنا اللى جبت ميدو لإنى كنت الصوت الخامس بعدما كان المجلس 4 أصوات وأدامهم 4 أصوات، رغم إن والدى كان شايف إن ميدو ييجى مدرب عام، لو نجحنا كلنا فى ضهره.

شاهد الفيديو بالضغط هنا

فى تخوف عند الجمهور إن أ.مرتضى منصور يمشّى ميدو ؟

أما أوفر احتياجات ميدو أقدر أحاسبه، وأنا شايف إن حلمى طولان متقدرش تحكم عليه واللاعيبة مبتاخدش فلوسها، أو مثلًا قطاع الناشئين أزمته مش فى محمود سعد لكن مفيش ملاعب، موضوع ميدو فالتصريحات اللى نزلت ليه إن ميدو مجرد موظف ورحيله وارد مضروبة، أنا عاوز المدرب ينجح وأدعمه، التدعيم هيزيد أضعاف أضعاف اللى شايفه دلوقتى.

بصراحة .. ميدو مكانش واخد صلاحيات كاملة الفترة اللى فاتت ؟

لا ميدو كان واخد صلاحيات بس كان فى ناس بتتدخل فى شغله، ناس من بره النادى، لكن ميدو والجهاز الفنى لازم ياخدوا الصلاحيات كاملة، بداية من الجهاز الإدارى والفنى واللاعيبة، النادى هيقوم بإنك تدعم كل حاجة صح، ولو فى ملاحظات نقدر نقولها لمدير الكرة وهو يبلغها، لكن المهم ميدو يركز فى الملعب ويشتغل مع الجهاز الفنى ويبدعوا، ميدو مش عاوز يخسر لكن عاوز بطولات، فمش ممكن نقف ضده لإن المصلحة واحدة.

شاهد الفيديو بالضغط هنا

إيه اللى مقدرتش تحققه كمعين وعاوز تحققه كمنتخب لو القائمة وفقت فى الانتخابات ؟

نقدر نقدم كتير لإن المجلس المنتخب ليه قوة، فى قوتين جايين نادى الزمالك الأولى مجلس منتخب والتانية مرتضى منصور، لإن الاتنبن شعله نشاط، وانت بتبقى عارف إنك قاعد فترة طويلة فتقدر تعمل خطط قصيرة وطويلة المدى، كان فى مشاريع كتير مقدرتش أنفذها لإننا كنا مجلس معين وفى مشروعات كتير مقدرتش أنفذها بسبب عدم وجود مرتضى منصور، وبصرف النظر عن الكلام المهم التنفيذ، من وأنا صغير بسمع عن برامج كتير جدًا، لكن قائمة مرتضى منصور بالعناصر المميزة اللى فيها هيدونى صلاحيات أقوى وقدرة على التنفيذ أعلى.

شاهد الفيديو بالضغط هنا

إيه الحاجات اللى فشلت فيها خلال فترة تعيينك ؟

كان نفسى أعمل حاجات كتير لكن نجحت بنسبة 15%، كل اللى عملته إنى أديت وأرضيت ضميرى، لكن محققتش ولا حلم، لكنه هيتحقق على مدار الأربع سنين، ولازم اللى ييجى بعدى يكمل الحلم ده، بس المهم أحطه على الحلم لسه بنسمع كلام ومحدش عمل حاجة، لما نجح ممدوح عباس فى 2009، أنا قولت الراجل ده معاه فلوس وقوة هيعمل حاجة، مكنتش أتخيل إن الزمالك اللى أنا سبته نادى آجى ألاقيه مركز شباب.

شاهد الفيديو بالضغط هنا

وإيه اللى اتعلمته من دكتور كمال درويش رئيس الزمالك وهتحاول تطبقه فى المجلس الجديد لو وفقت قائمة أ.مرتضى منصور ؟

د.كمال بيعجبنى فى موقف زى إنه استغل علاقة مرتضى منصور بوزير الإسكان علشان يحقق هدف معين للنادى، رغم إن فى منافسة تاريخية بينهم، فى نفس الوقت مرتضى عنده النقطة دى، لو درويش لم يوفق، مفيش نادى يمتلك واحد زيه وميستفيدش بيه، لازم استفيد بكل الخبرات، ومن أسباب انضمامى للقائمة إن مرتضى عاوز الناس كلها تشارك ونمحى الخلافات، بدليل إنه خد سيد متولى فى القائمة وهو قريب إسماعيل سليم اللى كان على خلافات معاه.

شاهد الفيديو بالضغط هنا

هل ممكن تستخدم خبرات أو أفكار لقوائم تانية ؟

لازم أجبها، هدفى مع القائمة إعداد كوادر ييجوا مكانا الأربع سنين اللى بعدينا، ولو نزلت الانتخابات الجاية هيبقى على منصب أعلى.

تنزل رئيس؟

لا مش شرط رئيس ماهو فى نائب رئيس.

ماهو يا رئيس أو نائب رئيس ؟

وإيه اللى يمنع يعنى؟!

أنا مبقولش فى حاجة تمنع لكن عاوز أعرف طموحك إيه ؟

أنا طموحى أبقى رئيس جمهورية،  من حق أى شاب فى مصر يبقى ليه طموح.

لو دخلت مع قائمة تانية هتعمل إيه ؟

هشتغل طبعًا لإن دى أمانة لإنى مش نازل علشان أنا ابن مرتضى بس لكن علشان أكون أد الثقة، بس إن شاء الله أكون مع مرتضى.

شاهد الفيديو بالضغط هنا

وهل وزعتوا الأدوار فى القائمة ؟

بالفعل قعدنا واتكلمنا فى الموضوع ده، وحطينا إيدينا على مشاكل النادى، لكن مرتضى منصور نفسه مكانش متصور إن الزمالك وصل للوضع المأسوى ده، أنا هقول حاجة مش عارف أقولها ولا لا، بس مرتضى كان بيدفع مرتبات الموظفين من جيبه، ومرة باع عربيته علشان يدفعها، مرتضى هيخلى الزمالك محترم زى ماهو والزملكاوية بيحلموا بيه وأنا معاه لحد مانحقق الحلم ده إن شاء الله.

شاهد الفيديو بالضغط هنا

بصراحة كده .. انت واخد سكة مختلفة عن مرتضى منصور، وبانت يوم الخميس اللى فات لما حصل خلاف مع المهندس رؤوف جاسر، قولت إن جاسر أبويا؟

لإن أى حد كبير فى نادى الزمالك أو البلد ليه احترامه علشان لما أكبر زيه الصغير يحترمنى، أتمنى أبقى زى مرتضى منصور، أنا مثلى الأعلى مرتضى منصور ومحمد حسن حلمى، عندى مشروع كبير قدمته فى المجلس لكن فى ناس اعترضوا، عبارة عن إن الألتراس لازم يكون ليه دور فى بناء مصر، وإلا تقتلهم!!، أرض أكتوبر حل سحرى وبحلم أشوف ستاد للزمالك، أى حد هيشوف رجالة بتشتغل بإيديها هيحاول يساعدنا بأى طريقة.

شاهد الفيديو بالضغط هنا

بس الجمهور عنده تصور إن مرتضى بيشارك فى كل الملفات حتى لو فى تقسيم معين وتكليف كل واحد بملف ؟

طب ما د.كمال بيعمل كده، مش أحسن ما كان ممدوح عباس بيحكم النادى لوحده محدش معاه، مرتضى من الناس الناجحة، خصوصًا إنه أقدم عضو مجلس إدارة واستمر من 93 حتى 2005 ودى الفترة اللى الزمالك خد فيها أكبر عدد من البطولات، لكن حصل تشويه ممنهج ومدفوع الأجر لمرتضى منصور، كابتن شوبير مع احترامى ليه شارك بشكل رئيسى فى تشويه صورة مرتضى اللى أعتقد إنه اتظلم، لكن من ساعة ما مشى الزمالك مابقاش زى ماهو، الانتخابات دخل فيها فلوس من ساعة ما ممدوح عباس اترشح رئاسة فى 2009 ودى أزمة بيعانى منها النادى، مرتضى جاب أعظم اللاعيبة فى تاريخ النادى زى عمرو زكى وأيمن شوقى ومحمد عبدالجليل وإيمانويل وحسام وإبراهيم وأحمد الكأس وجونيور وأحمد فيليكس وتعاقد مع المدرب الهولندى كرول والبرازيلى كابرال، 50% من بطولات النادى شوفتها فى عهد مرتضى.

شاهد الفيديو بالضغط هنا

شاهد الفيديو بالضغط هنا

لو مرتضى موفقش فى الانتخابات هل ممكن يطعن على النتيجة ؟

مستحيل

أخيرًا معاك دقيقتين قول فيهم اللى انت عاوزه؟

بقول لأعضاء النادى إن البلد عاوزة تتبنى واختاروا الأصلح، مفيش وقت ضاع من عمر نادى الزمالك 8 سنين، عاوزين نبدأ علشان نلحق نكمل، واللى ييجى بعدنا نكمل.

الرسالة التانية اللى حابب أوجهها، إن كل الشباب يبدأ يستعد لانتخابات 2018، النادى ده مش بتاع حد ولا بتاع ابن حد، إنما الناس هتنتخبنى علشان اشتغلت، واللى مش ابن حد يجيلى يقولى فكرته وأنا أساعده وأخليه فى موقع مسئولية ويشتغل ويطلع أفكار، المكان ده هيتبنى بينا كلنا.

شاهد الفيديو بالضغط هنا

ويتقدم "الزمالك اليوم" بخالص الشكر لـ"أحمد مرتضى" على حسن ضيافته ولباقته وسعه صدره ومرونته فى الإجابة على جميع الأسئلة.



أجرى الحوار / كريم عبد المحسن

شاهد الفيديوهات
zamalek fans
التعليقات
أخبار أخرى
الإتحاد الدولي يُقرب آلان جريس من تدريب الزمالك ... إقرأ التفاصيل
مفاوضات بشكل رسمي : أهلى آخر يرغب فى خطف ستانلى من الزمالك!!!
الفهد الأسمر يرغب فى العودة بقوة وهذا هو الدليل
الأخبار السارة تتوالى فى قلعة ميت عُقبة
ثروت سويلم يواصل الجهل اللائحى ويُهدد لاعب الزمالك!!!
3 أفارقة على ترابيزة الزمالك من أجل وضع خطط لتعويض الراحلين
هذا المدرب مُرشح لتدريب الزمالك لخلافة محمد حلمى
الزمالك بدأ فى البحث عن بديل الموهوب و"الزمالك اليوم" يُرشح هذا اللاعب
"خاص" كهربا يوضح حقيقة طلبه الإنتقال للأهلى ويكشف المستور
حسن شحاته يتحدث مستقبل الزمالك معه كمدرب! ووجهة نظره فى العمل مع المستشار
الجهاز الطبي للزمالك يُعلن سلامة ثنائي الزمالك بشكل طبيعى
الزمالك يُخطط لخطف اللاعب المهاري الخطير
الزمالك يرفض طلب إتحاد الكرة قبل الخضوع لطلبات الزمالك
مايوكا الأصيل : يُبرز دور الزمالك فى عودته لمنتخب بلاده!!!
مرتضي منصور يكشف موعد حل مباراة الأزمة وموقف الزمالك الآن