حرص أحمد عفيفي مقدم برنامج فن وهندسة عبر قناة نادي الزمالك، التعليق على الأحداث الكروية الأخيرة وتصريحات سيد عبد الحفيظ مدير الكرة بالنادي الأهلي عقب الخسارة أمام المحلة.
وقال عفيفي عبر قناة الزمالك : صدعونا على مدار سنوات بمجموعة من الشعارات الكاذبة الساذجة اللي بتقول على فكرة ميزة النادي ده أنه مبيشتكيش من التحكيم وأنه مش شاغل باله بغيره أبدا وأنهم شاغلين بالهم بنفسهم بس.
وأضاف : ولو جبت طفل 4 سنين هيعرف مدى سذاجتهم لان نفس النادي ده مش لما بيخسر لأ ده لما نتائجة بتهتز بس مش بيخسر بطولة أو مش بينهار أو مش بيتم اللعب باستقراره بحل مجالس والمصايب اللي بتحصل في الاندية التانية دي لأ، ده يدوبك بس أول تعثر بيطلعوا يتكلموا عن التحكيم.
وواصل : وبيطلع مدير الكرة في النادي ده في فيديو 15 دقيقة منهم 16 دقيقة بيتكلم على النادي التاني وبيحصل الحاجات اللي دايما بتقولوا مبتحصلشي وأتمنى لما تحصل المرة دي لانها اتكررت 1900 مرة محدش يقول متعودناش على كده لا انت اتعودت وانت مش واخد بالك بس، انت بس اللي بتختار تشوف الموقف ده كعيب عند ناس أو كل الناس إلا طرف واحد ودي مشكلتك أنت مش مشكلة أي حد تاني
