يسود الاتجاه رسمياً داخل اتحاد الكرة المصرى للتجديد لكيروش المدير الفنى لمنتخب مصر حتى تصفيات كأس العالم القادمة 2026.
وبغض النظر على انه مش عارف ليه بيتجدد له، ومش عارف ليه هو بيفرض شروطه علينا، ومش عارف ليه حالة الضعف قدامه من قبل مسئولى اتحاد الكره، وبرضة مش عارف ليه كل حاجة حاضر حاضر.
ومش عارف ليه برضة انه يبى الحكم بأمره فى المنتخب بدون اى تدخل من حد، ولا ان الراجل هيتم التجديد له بنسبة كبيره رغم معارضة قطاع كبير من المصريين.
مع ان الراجل يعنى مجبش الديب من ديله، ومحققش معانا حاجة بس مش مهم، ودى نقطة مش مهمة اوى يعنى يحقق او ميحققش المهم انه مكمل.
المهم دلوقتى وانتم يامسئولى اتحاد الكرة "اللى عمالين تضحكوا على الناس وتقولوا مباراة مصر والسنغال هتتعاد" وانت بتعمل عقد كيروش لمدة 4 سنوات خلى الشرط الجزائى بسيط يعنى شهرين بالكتير.
علشان لما يحصل حاجة نعرف نخلية يمشى باقل الخساير مش يبقى موت وخراب ديار من كل ناحية.
يعنى ياريت بلاش 4 شهور شرط جزائى ولا حتى 3 شهرين حلو .. حلو اوى.
ونصيحة اخيره ياريت يتم التفكير فى الامر من الاساس وعدم التجديد له .. اه بالمناسبة ماتش مصر والسنغال مش هيتعاد وكفاية كلام فى القصة دى فى الاعلام.
