أوضح الناقد الرياضى خالد طلعت حقيقة الصورة المنتشره من جمهور الاهلى فى هذه الفترة، والتى تجمع مرتضى منصور رئيس النادى بالحكم محمود عاشور.
هذه الصورة كانت بعد نهاية احدى المباريات، ويحاول البعض من اعلامى وجمهور الاهلى تأليف حكايات عنها، ليوضح خالد طلعت الحقيقة.
وعبر صفحته الشخصية على موقع التواصل الاجتماعى فيس بوك كتب خالد طلعت قائلاً :
توضيح مهم جدا لصورة مرتضى منصور مع محمود عاشور اللي بيتداولها ناس كتير ، وبيقولوا ان الصورة دي معناها ان عاشور زملكاوي وعلاقته كويسة بالزمالك وبمرتضى !!!
الصورة دي كانت بعد مباراة الزمالك والمصري في قبل نهائي كأس مصر 8 أغسطس 2017 ، ومحمود عاشور كان حكم المباراة دي
عاشور في المباراة دي كان ضد الزمالك ، وحسب ركلة جزاء للزمالك وبعدين رجع فيها في سابقة نادرة الحدوث رغم عدم وجود فار ساعتها ، وادى 4 انذارات للاعبي الزمالك ومفيش ولا انذار للمصري ، وفي الدقيقة 86 قبل نهاية المباراة باربع دقائق حسب ضربة جزاء مشكوك فيها للمصري كسب بيها الماتش وتأهل للنهائي والزمالك خرج من الكاس.
بعد الماتش كانت جماهير الزمالك كلها ساخطة على محمود عاشور وبدأوا يهتفوا ضده ويشتموه وكانوا مستنيينه وهو خارج من الملعب عشان يرموا عليه زجاجات مياه.
مرتضى منصور عشان ينقذ الموقف ومتحصلش مشكلة نزل الملعب واخده من ايده وخرج بيه عشان يحميه وعشان جمهور الزمالك ميرميش عليهم أي حاجة.
هو ده الموقف من الألف الى الياء ، يعني الصورة دي كانت عشان عاشور كان ضد الزمالك وجمهور الزمالك كان ساخط عليه مش العكس
أخيرا محمود عاشور برضه في ماتش الزمالك وانبي في الدوري يوم 25 ديسمبر 2014 لغى جولين للزمالك في الماتش ده وحسب ضربة جزاء لانبي كسب بيها الماتش ، والزمالك كان هينسحب من المباراة اعتراضا على عاشور
