شن مرتضى منصور رئيس النادى، هجوم كبير على ممدوح عباس رئيس النادى الاسبق، بسبب حجزه على أرصده نادى الزمالك فى البنوك.
منصور وفى تصريحات تلفزيونيه له قال : ممدوح عباس ملوش جنية عند نادى الزمالك، وهكشف كل الحقايق فى مؤتمر يوم الاربع اللى هعملة فى النادى.
ممدوح عباس نفسه طلع مع احمد شوبير فى 2006، وقال انه اتبرع بـ 40 مليون جنية للنادى، ورجع فى كلامة وقال انه قرض، وعلشان الفلوس دى تبقى قرض لازم تكون بقرار مجلس ادارة، ويتعمل بيه محضر الى مديريه الشباب والرياضه.
الكلام دا محصلش والكلام دا برضة محصلش مع فلوس تركى الشيخ وقصته مع النادى الاهلى،
هو بيقول انا حجزت على بنك واحد، دا البنك الوحيد اللى فيه فلوس الزمالك أصلاً، دا كويس ان احنا اتعادلنا بعد ما اللاعبين عرفت انه محجوز على فلوسها.
مين حامى الشخص دا فى مصر، انا عرفت انه كلم كل الناس والكل قاله اتهد بقى، انت بتضرب الزمالك يا ممدوح يا عباس فى أخطر اسبوع وهو اسبوع الصفقات.
عموما احنا اتصرفنا يا ممدوح يا عباس وكل لاعب اتفقنا معاه هياخد فلوسه، علشان أحرق دمك انت ومحاميك الاخوانى.
ووجه رساله اخيره الى رئيس مجلس الوزراء الدكتور مصطفى مدبولى، قائلاً له احنا مش عارفين نشتغل بسبب الراجل دا مش ممكن ياجماعه .. مين اللى بيحميه فى مصر.
