واصل طارق يحيي نجم الزمالك الاسبق، هجومة على البرتغالى فيريرا المدير الفنى للفريق، بعد هزيمة الامس من نادى أسوان.
فيه ايه مش عوايدك، الادارة موفره لك كل حاجه، وجايبه لك لبن العصفور، فى ايه فى دماغك.. هو مش كن فيكون كلامك يعنى.
مينفعش يبقى فيه اصرار على الغلط بالمنظر دا .. واحنا مثلاً مش جايبين مصطفى شلبى نقعده فى البيت، دا سليم بقاله كتير يبقى ليه برا القايمه.
بدون زعل اللى بيحصل دا لو بيحصل من مدرب مصرى، مش ممكن كان يقعد 24 ساعه كمان فى تدريب النادى، لكن الادارة فى الزمالك عايزه استقرار.. ومش معقول هفضل أساند أساند واروح فى حته تانية بعد كدا.
لازم يكون فى وقفه وتدخل من مرتضى منصور منصور، واحنا مش بنعبد أصنام ومفيش خط أحمر الا الزمالك، ولو دا اخر يوم ليا فى قناة الزمالك مش هتطبطب ضد مصلحة الزمالك.
عندنا الفترة الجاية مباريات كتير وصعبه، ولازم وقفه، ولازم فيريرا يجهز كل اللاعبين، ويعمل ماتشات ودية يجهز كل اللاعبين ويجرب فيها.
انا أسف لو انفعلت، بس لازم نستفيد من اللى حصل، ونلم نفسنا بسرعه، وعيب الزمالك يدخل فيه اهداف بالمنظر دا.
