خسر بالامس الفريق الاول لكرة القدم بالنادى من فريق بيراميدز فى نصف نهائى كاس مصر، وودع بطولة الكأس البطولة المفضله له.
حالة غضب وحزن كبيره وقلق لجمهور الزمالك منذ الامس على الفريق، خاصة ان الحزن ليس على الهزيمة بقدر ما هو على الاداء.
وبكل صراحه مستوى الزمالك فى الفتره الاخيره ومنذ بداية الموسم عليه العديد من علامات الاستفهام لاسباب عديده.
أولا : استهتار ما بعده استهتار من لاعبين يقوموا بعملية ازالة شعر فى أحد المراكز المتخصصه، ويصورون انفسهم وينشرون هذه الفيديوهات فى توقيت صعب وحرج للفريق، ومحدش يقولى دى حرية شخصية، ومن قبلهم بالمناسبة امام عاشور وصبغة الشعر.
ثانياً وبكل صراحه وباللغه العامية : فى "معلمين" فى الفرقه، والحقيقة الزمالك طول عمره موعود بالنكبة دى " المعلمين" اللى بيبقوا فى الفريق.
ثالثا : فيريرا ومع كل الاحترام له يعنى لا طريقة لعب مناسبة ولا لاعبين فى مراكزهم، ولا تغييرات وكأن الموضوع مش فارق معاه.
رابعاً : زيزو بعد التجديد مبقاش زيزو .. بقى يضيع حتى ركلات الجزاء، ولعب بأنانية وحاجات مش مفهومة.
خامساً : فى أكثر من لاعب حاسس أنه أكبر من الفريق، وأنه اكبر من النادى وإن انا لو مشيت الزمالك هيتأثر.. ودى مش حقيقة، مفيش نجم الا الزمالك.. والزمالك هو من يصنع النجوم، وبصوا على كل اللى خرجوا من الزمالك فى الفتره الاخيره بس وابتعاد الاضواء عنهم.
أخيراً وليس بأخر ولسه فى كلام كتير.. دى مجرد أسباب مبدئية : بالنسبة لفيريرا تحديداً لازم يكون فيه كلام تانى بعد مباراة القمة، لان بالمنظر دا احنا فى كارثه.. بس مش وقته
