علق الناقد الرياضي خالد طلعت على الأحداث الأخيرة داخل نادي الزمالك عقب قرار القضاء الادارى اليوم بعزل مرتضى منصور زوال صفته من رئاسة الزمالك.
وذلك بناء على دعوى تم إقامتها من عدد من أعضاء الجمعية العمومية للزمالك، استنادا الى تنفيذ مرتضى منصور حكم بالحبس شهر في أحد قضايا محمود الخطيب رئيس النادي الأهلي بالسب والقذف.
خالد طلعت وخلال تصريحات له عبر حسابه على موقع التواصل الاجتماعي فيس بوك تحدث قائلا:
من وانا صغير وأنا لسه طالب في الجامعة وكان لسه عندي شعر ساعتها
- مرتضى منصور يبقى رئيس نادي الزمالك .. الناس اللي بتحبه تفضل تهيص .. والناس اللي بتكرهه تبقى زعلانه
- بعديها بشوية مرتضى منصور يسيب نادي الزمالك (سواء بالانتخابات أو بحكم قضائي أو بقرار من وزارة الرياضة) .. الناس اللي بتحبه تبقى زعلانه ومتضايقه .. والناس اللي بتكرهه تبقى مبسوطة
- بعديها بشوية مرتضى منصور بيرجع تاني رئيس نادي الزمالك (سواء بالانتخابات أو بحكم قضائي) .. الناس اللي بتحبه تفضل تهيص .. والناس اللي بتكرهه تبقى زعلانه
- بعديها بشوية مرتضى منصور يسيب نادي الزمالك (سواء بالانتخابات أو بحكم قضائي أو بقرار من وزارة الرياضة) .. الناس اللي بتحبه تبقى زعلانه ومتضايقه .. والناس اللي بتكرهه تبقى مبسوطة
* الحالة دي فعليا عايشين فيها وبتكرر بقالنا 20 سنة تقريبا من 2005 لحد النهاردة وحصلت أكتر من 10 مرات رايح جاي ، والغريب ان الناس برضه بتفضل تكرر نفس رد الفعل
كل مرة مرتضى يمشي الناس اللي بتكرهه تظيط وتفرح والناس اللي بتحبه تزعل ، ولما يرجع يحصل العكس
أنا بس باقول كده عشان الناس تهدى شوية ، لما مرتضى يمشي بلاش اللي بيكرهوه يفرحوا قوي وبلاش اللي بيحبوه يزعلوا قوي ، ولما مرتضى يرجع بلاش برضه يحصل العكس
الأحداث بتتكرر وبتتعاد بنفس التفاصيل ونفس ردود الفعل وكأننا عايشين في فيلم ألف مبروك بتاع أحمد حلمي
