هاجم الناقد الرياضي خالد طلعت، ما بدر بالأمس من تصريحات وتراشق بين المهندس عدلي القيعي مستشار التعاقدات في الأهلي و خالد الغندور نجم الزمالك السابق.
وكان عدلى القيعي يد بدأ بالتلقيح ووصف الزمالك بأنه مثل سيد العمدة، في اشارة الى مسلسل جعفر العمدة الذي كان في رمضان الماضي.
ليرد خالد الغندور عبر قناة الزمالك بأن هناك شخصيات تشبه وداد، وأندية أخرى حول العالم تشبه دلال، بشكل وصل الى حد ليس جيد من التراشق.
خالد طلعت وعبر تصريحاته من خلال حسابه على موقع التواصل الاجتماعي فيس بوك تحدث قائلا:
اللي حصل من تصريحات بين المهندس عدلي القيعي وكابتن خالد الغندور مينفعش وميصحش وهيودينا في حته مش كويسة خالص واكيد كلنا مش عايزين نروحلها
مينفعش واحد بحجم مهندس عدلي قيمة وقامة ، وراجل كبير سنا ومقاما ، وله تاريخ كبير قوي وحاليا رئيس شركة الكورة بالاهلي انه يقول على الزمالك انه زي سيد أخو جعفر العمدة وان الأهلي هو جعفر ودي كلمه فيها اهانة لنادي الزمالك العريق وجماهيره العريضة
ومينفعش برضه ان خالد الغندور احد الكباتن التاريخيين للزمالك والاعلامي الأهم والأشهر بقناة النادي انه يقول ان فيه اعلاميين عامليين زي وداد ، وان فيه نادي بياخد حاجات مش من حقه عامل زي دلال وده فيه اهانة رهيبة للنادي الأهلي العظيم وجماهيره الغفيرة
مينفعش الأمور توصل لكده من اهانات وتلقيح بالكلام بين الطرفين لأن ده للأسف بيزود التعصب والاحتقان بين جماهير الناديين وممكن يودينا لا قدر الله لكوارث احنا في غنى عنها
لازم يبقى فيه تدخل فوري من مسئولين كبار في الدولة سواء في وزارة الرياضة أو المجلس الأعلى للاعلام بوقف المهاترات دي فورا حتى لو وصل الأمر لاغلاق قناتي الأهلي والزمالك أو قصرهم على بث مباريات فقط من أجل نبذ التعصب
النادي الأهلي عنده ماتش مهم يوم الجمعة والمفروض يبقى فيه تكاتف من الناس كلها والمفروض ان كل جماهير مصر تشجعه ، هل الزملكاوية لما يلاقوا عدلي القيعي بيقول كده على ناديهم أو الغندور الرمز بتاعهم بيقول كده على الأهلي هل ساعتها هيشجعوا الأهلي ؟؟!!
بطالب بالمهندس عدلي القيعي اللي بدأ والأكبر سنا بالاعتذار لنادي الزمالك وجماهيره ويأكد انه أخطأ وانه مكانش يقصد كده ، وبعديه على طول لازم خالد الغندور برضه يعتذر لجمهور الأهلي عشان نحاول نهدي الأمور
الأهلي والزمالك ناديين كبار ودي رياضة وكورة للمتعه والترفيه والتسليه مش حرب ولا حاجة تخص الدين ولا الوطن ، الأمور أبسط من كده ، والدنيا مش مستاهله نتخانق وناخد ذنوب عشان الكورة
