علق الناقد الرياضى خالد طلعت على التناقض الاعلامى الكبير فى مدح مصطفى شوبير حارس مرمى الاهلى الشاب، بالطبع بسبب والده احمد شوبير.
حيث حلل بالارقام أن مصطفى شوبير من الاساس لم يختبر فى مباراتى طلائع الجيش وسيراميكا كليوباترا الذى شارك فيهم.
وعبر صفحته الشخصية على موقع التواصل الاجتماعى فيس بوك كتب خالد طلعت قائلاً :
مصطفى شوبير لعب أخر ماتشين مع الأهلي أمام الجيش وسيراميكا ، وأدى أداء (كويس) والكرات القليلة اللي راحت عليه تعامل معاها بأسلوب (كويس)
لكن للأسف الشديد أنا شايف مبالغة كبيرة جدا من ردود أفعال بعض الأصدقاء الصحفيين والاعلاميين عن أداء مصطفى وكأنه عمل معجزه ومعظمهم بيقول جملة واحدة بس غريبة (مصطفى شوبير حارس مرمى منتخب مصر الأول الـ10 سنين الجايين !!) ، وده طبعا عشان والده كابتن أحمد شوبير ، لو أي حارس تاني بنفس الظروف أدى بنفس الأداء واسمه مثلا مصطفى حسين مكانش هيتقال عليه كده.
وللأسف كمان فوجئت ان المحللين الاربعة في اون سبورت بالاجماع اختارو مصطفى شوبير Man of the match في ماتش سيراميكا امبارح برضه مش عارف ليه عشان نفس السبب اللي فوق !!.
ماتشين الجيش وسيراميكا تقريبا كانوا من جانب واحد من الأهلي ، ماتش الجيش الأهلي سدد 11 كرة على المرمى منهم 4 بين القائمين والعارضة والجيش سدد 5 كرات فقط على مرمى الأهلي مفيهمش ولا تسديدة بين القائمين والعارضة !!
ماتش سيراميكا الأهلي سدد 16 كرة على مرمى سيراميكا وسيراميكا سدد 3 مرات فقط على مرمى الأهلي منهم 2 بس بين القائمين والعارضة !!
وكمان الاهلي عمل 24 كرة عرضية على مرمى سيراميكا وسيراميكا عمل 5 عرضيات فقط على مرمى الاهلي.
انا اعرف حارس مرمى ياخد احسن لاعب في المباراة لو فريقه مضغوط طول الماتش وتصدى لـ6 أو 7 فرص منهم 4 مثلا محققة انفرادات مش تصدى لتصويبتين فقط طول 90 دقيقة !!
ولو الناس بتتعامل مع شوبير انه سنه صغير مصطفى مش صغير لأنه تم 23 سنه من كام يوم وماشي في 24 يعني مش لاعب ناشىء ولا شاب
مصطفى اصغر من محمد صبحي حارس الزمالك بـ10 شهور بس، وصبحي لعب 89 ماتش وشوبير لعب 11 ماتش بس !!!
والله العظيم وبحلف انا مش ضد مصطفى ولا ضد شوبير الكبير، وانا شايف أوفا حارس كويس، وبتمنى له النجاح والتوفيق، ولكن فعلا ردود فعل كتير من الصحفيين والاعلاميين مستفزه جدا ومبالغ فيها بشكل فج عشان خاطر والده وممكن تجيب أثار عكسيه على الولد نفسه وعلى الجمهور، وبتخليني مقدرش امسك نفسي ولازم اتكلم حتى لو كنت انا الوحيد اللي بسبح ضد التيار
