أشاد الفنان الاهلاوى محمد عطية بمحمود عبد الرازق شيكابالا لاعب نادى الزمالك، على كافة المستويات.
أحد لاعبى الاهلى السابقين الذى يقدم احد البرامج "معرفش إزاى" كل همه فى برنامجه الهجوم على شيكابالا تحديداً، وكل ما هو زملكاوى بصفة عامة.
وعبر صفحته الشخصية على موقع التواصل الاجتماعى فيس بوك كتب محمد عطية قائلاً :
أنا أهلاوي جدا و كل اصحابي عارفين ده بس أنا هقولك ليه بحب شيكابالا و بعتبره واحد من انضف الناس اللي عرفتهم حياتي و اصدقهم”.
شيكا برة الملعب من الناس اللي عمره ما يتخلى عن واحد صاحبه و ماعندوش حسابات النجوم ولا مرة شفته بيعامل حد وحش و لما بيسعى في خير بيبقى بيعمل كده بجد و من قلبه و مش عاوز ياخد اللقطة ولا أي حاجة لأني شفت بعيني و ربنا يشهد على كلامي انه بيعمل قد اللي بنشوفه في التليفزيون و بيوصل للناس عشر مرات.
شيكا ليه أصحاب من أسوان لحد اللحظة دي بياخدهم معاه في كل حتة و لا عمره استعر منهم و لا قلل منهم قدام حد .. شيكا جواه طفل بكل ما تحمله الكلمة من معنى .. بيتعصب بسرعة جدا و ممكن يعمل تصرفات غير محسوبة تكلفة كتير و لكن احنا كلنا لو معانا كاميرات طول الوقت هتلاقينا بنعمل زيه واكتر في شغلنا في اللعب حتى اللي مش على بطولات .. بلاي ستيشن .. خماسي .. أي حاجة .. ده مش معناه ان ده تصرف صح و لا عمره شيكا قال ان ده تصرف صح و لا يبرر تصرفاتنا الغلط.
يا عم سيبك مننا احنا .. ايريك كانتونا واحد من امهر لاعبين فرنسا و مانشستر يونايتد و كان اكتر واحد بيتنرفز في الملعب لدرجة ان ليه لقطة شهيرة و هو بيضرب مشجع و اتوقف ساعتها فترة كبيرة .. لكن كانتونا من ساعة بداية الحرب و هو مافيش يوم بيعدي غير و بيدعم و بيتكلم وفي اي محفل انساني بيكون اول واحد بيدعم و يشارك و ما بيفكرش في أي أضرار ممكن تصيبه.
شيكا لاعب لا يختلف اتنين على مهارته و التقليل من مهارته و موهبته شئ مش عقلاني .. أنا البوست ده بكتبه عشان دي شهادة حبيت اقولها عن واحد عاشرته و أكلت معاه عيش و ملح و عمره فيوم ما خان الصداقة و لا العيش و الملح .. بيغلط اه طبعا بيغلط بس نرفزة الملعب اللحظية ده جزء من اللعبة في ناس عندها قدره للسيطرة عليها و ناس لا بس إنسانيا أنا اجزم انه واحد من انضف الناس اللي أتعاملت معاهم فحياتي.
