انتقد الناقد الرياضي فتحي سند مواعيد المباريات في تصفيات كأس العالم عن قارة أفريقيا.
حيث لعب مباراتين في 4 ايام فى ظل ظروف قارة أفريقيا المعروفة، حيث صعوبة التنقل وبعد المسافة، فى ظل أن هناك وقت يسمح بإقامة المباريات على أيام بعيدة.
وعبر صفحته الشخصية على موقع التواصل الاجتماعي فيسبوك كتب الناقد الرياضي فتحي سند منتقداً :
واضح إن الفيفا وكمان معاهم الكاف مش عارفين طبيعة أفريقيا وصعوبة التنقل بين الدول الأفريقية.. ما أنا مش لاقي سبب مقنع إن منتخب يلعب ماتش وبعد 72 ساعة يبقي عنده ماتش تاني في دولة بعيدة عنه في سفر بينهم 10 ساعات ولا آكتر وكمان ترانزيت وبهدلة من مطار لـ مطار..
وفي الاخر يقولك عايزين كورة حلوة عايزين منتخبات بتقدم متعة كروية.. طيب قولي مين اللاعب اللي بعد ما يخلص 90 دقيقة وبعدها يتمرمط في المطارات وفي أدغال أفريقيا ولا استشفاء بقي ولا راحة ولا يحزنون.. إزاي هيقدر يروح يلعب الماتش التاني وهو في قمة جاهزيته.. مستحيل يقدم ولو ربع مستواه حتي..
طب إحنا في مصر الحمد لله منتخبنا بيتحرك بطيارة خاصة.. لكن في منتخبات معندهاش حاجة خالص.. هيعملوا أيه دول ؟؟؟
سؤالي هنا.. إيه المبرر إني العب جولتين في تصفيات المونديال خلال 72 ساعة.. وبعد كدا نريح 9 شهوووور يا مؤمن ونلعب الماتش اللي بعده في مارس 2025.. دا أسمه أيه بقي ولامؤاخذة ؟؟!!
