حرص الاعلامى ابراهيم فايق على توجيه رسالة الى جمهور نادى الزمالك، فى ظل هجوم شريحة من الجمهور عليه بالأمس بعد حديثه عن صفقة بن شرقى وانتقاله لـ الاهلى.
وعبر صفحته الشخصية على موقع التواصل الاجتماعى إكس كتب ابراهيم فايق رسالته الى جمهور الزمالك :
طيب مساء الورد يا جماعة.. هذا بوست البوست موجه لجمهور الزمالك على السوشيال ميديا 🌹
حابب أوضح نقطة مهمة لجمهور الزمالك على السوشيال ميديا.. لأنهم هيفضلوا طول الوقت لهم تقدير كبير جدا عندي.. وبينا مواقف كتير محترمة بدأت من زمن ومستمرة إلى ما لا نهاية.
البعض زعل مني امبارح ظنا منهم اني في البوستات بتاعتي عن صفقة بن شرقي كنت فرحان وده طبعا محصلش أبدا.. اللي حصل واللي الكل شافه اني كنت برد على بعض الشخصيات ممن قللت من مصداقية كلامي فكان لابد من الرد بحسم دفاعا عن شغلي ومصداقيتي.. والبعض الآخر كنت بهزر معاه من باب المحبة لأنه سخر مني وقالي حط بن شرقي ع الشاحن.. دون تفريق بين كونه زمالكاوي او أهلاوي زي ما حصل مع مشجع طلع اهلاوي ودمه خفيف واخدنا الموضوع بتهريج.
النهاردة لاحظت ان الناس مكانتش متابعه امبارح فبعض الصفحات نشرت كلام مخالف للواقع، الغرض منه تحويل غضب جمهور الزمالك من توقيع بن شرقي للأهلي للغضب مني شخصيا بقصد وتعمد كاذب للأسف.
علشان كده أنا بكتب البوست ده بمنتهى التقدير والمحبة ومصحوب بشكر لكل الناس اللي ردت عني ووضحت الموضوع.
هفضل طول الوقت حريص على علاقتي بجمهور الزمالك زي حرصي على علاقتي بجمهور الأهلي.. وارد تختلف معايا جدا وتنتقدني بس يفضل الاحترام بينا مستمر.
خالص تحياتي
