تحدث الناقد الرياضى أحمد عبد الباسط عن بعض كواليس اختيار لقب أفضل لاعب فى المباراة، وهو التقليد الاخير من رابطة الاندية.
الأمر الذي كثُر الحديث عنه فى الفترة الاخيرة، بعد أزمة محمود بنتايك الاخيرة، وسحب الجائزة منه، ومنحها للاعب بتروجيت فى لقاء الفريقين الأخير.
وعبر صفحته الشخصية على موقع التواصل الاجتماعى فيس بوك كتب أحمد عبد الباسط قائلاً :
جائزة رجل المباراة "الأونطة"
شركة النيل للتطوير العقاري الراعية للدوري تم وضع بند في عقد الرعاية بينها وبين الرابطة أن يتم تسليم جائزة رجل المباراة في كل مباراة بالدوري وتكون الجائزة عليها اسم المطور العقاري.
طيب ببساطة.. حضراتكم ابتدعتم فكرة هنقول إنها تمشي.. مع إن الدوريات الكبرى مفيش فيها الكلام ده، فكان عادي جدا نعمل، أفضل لاعب في الجولة ، أو الأفضل في الشهر لكن نعملها في كل المباريات واحنا أصلا اللي عندنا دي مش كورة لكن ميجراش حاجة.
يبقى مينفعش بقى نعمل الجائزة بأبو بلاش لأن ده عيب، احنا وصلنا في فترة من الفترات إن المراقب كان عنده تعليمات من الرابطة إنه يبلغ مدير الكرة في الفريق الكسبان بإنه يختار أحسن لاعب من فريقه.
ومدير كرة قال لي شخصيًا.." أنا في مرة اخترت لاعب مكانش الأفضل وكان نازل بديل بس كان عنده ظرف أسري فحبيت أظبط معنوياته"، وبالمناسبة كلام أفشة عن إن معايير الجائزة دي "أونطة" كان عنده حق لأن ما خفي كان أعظم.
فحضراتكم.. الموضوع بسيط ممكن تعملوا تعاقد مع لجنة أو ناس متخصصة تكون دي وظيفتها بدل ما الناس بتتفرج علينا ويكون الموضوع فيه حيادية أكتر.
أخيرًا.. وللحديث بقية، ما حدث مع بنتايك لاعب الزمالك كان يستوجب بيان اعتذار وقد تم اقتراح هذا بالفعل داخل الرابطة ولكن تم رفض المقترح.
