علق رحاب أبو رجيلة عضو مجلس ادارة نادي الزمالك السابق على الأنباء المتداولة خلال الساعات الماضية عبر السوشيال ميديا بشأن توقيع أحمد السيد زيزو للنادي الأهلي
أنباء خرجت مؤخرا غير مؤكدة تتحدث عن توقيع زيزو للنادي الأهلي، في ظل نهاية عقده مع الزمالك نهاية الموسم الحالي
رحاب أبو رجيلة من خلال حسابه على موقعه التواصل الاجتماعي فيسبوك تحدث قائلا:
انا مش حابب اتكلم فى قصه زيزو مضى ممضاش هيقعد هيمشي انا بس هتكلم عن فكره ممكن الناس تقولى دى مش وقتها بس انا شايف ان هو ده الصح وغير كده حتى لو مضى زيزو وقعد طب واللى بعد كده هنعمل ايه انا مقدر تماما رغبه جمهور الزمالك فى بقاء لاعب مهم زى زيزو
الاخبار اللى نزلت بتقول ان الاتفاق ٣٠ مليون والباقى هيتم تمويله من عقد اعلانى لمشروب طاقه ومتبقي مبلغ بسيط من بعض المحبين
نرجع هنا بقه للكلام المهم على الاقل لى اللى هو بقه ازاى النادى فى كل الظروف الصعبه دى لحد الان مش قادر يخلق اى موارد ولا تمويل من رعايات كبيره واعتماده فقط بس على تمويلات المحبين طب على الاقل اداره تسويق محترفه تحط رجلك على اول الطريق انا ممكن افهم كل الظروف الصعبه اللى فيها اداره النادى وابقي مقدر جدا للوضع المالى السيئ لكن اللى مش قادر افهمه ولا ابلعه هو عدم قدرتنا على وضع اسس وقواعد وادارات محترفه لمساعدتنا .
ابتدى خطوات جاده زى خطوه لجنه التخطيط فى كل ملفات النادى على الاقل تخلى الناس تحس بان فيه نور جاى حتى لو من بعيد
انا قولت قبل كده ان الحل الاخير للنادى هو ارض اكتوبر وما زلت لكن حتى ده استثمار طويل الاجل هيقعد على الاقل من ٢ الى ٣ سنوات علشان يبتدى يدخلك دخل تعتمد عليه ما ينفعش نقعد نستنى كل ده من غير خطط بديله
اعتقادى ان ده الملف الاصعب اللى لازم اداره الزمالك تشتغل عليه ابتدى نظم نفسك فى كل الاتجاهات واشتغل لنادى الزمالك وورينا ان فى نور جاى فى اخر الطريق
وفى النهايه علشان كلامى ما يتفهمش غلط او يتفسر اى تفسير انا مع بقاء زيزو فى النادى تحت اى ظرف وباى اسلوب ومش بس زيزو لا كل لاعيبتنا ومش فى الكره بس لا وكمان فى كل الالعاب
