تخرج علينا تصريحات من قناة الزمالك يومياً سواء مذيعين القناة أو المتحدث الرسمي تتحدث عن الفترة القادمة، والتجهيز لـ الفترة القادمة، وانه لا يوجد استعجال فى اى ملف سواء ملف الصفقات او المدير الفنى.
الزمالك اليوم له هنا كلمة لوجه الله، ولمصلحة الزمالك فنحن لا يهمنا الا مصلحة الزمالك فقط، ولـ معرفتنا بالوضع نؤكد على بعض الأمور لله ولمصلحة الزمالك.
ياجماعة الخير الكلام اللى بيطلع من قناة الزمالك دا أو المتحدث الرسمي عن عدم الاستعجال يتقال فى توقيت يكون الفريق فيه مكتمل ويحتاج فقط لبعض التدعيمات البسيطة، وتكون الامور مستقرة، لكن إحنا فى وضع صعب.
حيث الفريق لا يوجد له مدير فنى حتى الآن، والفريق يحتاج الى غربلة، واللى بيخاف على الزمالك بجد محدش يقول الفريق فيه أفضل لاعبين فى مصر، ويحتاج لعدد محدود من التدعيمات .. لا .. الفريق لا يوجد به سوى حوالى 8 لاعبين يصلحوا للتواجد فى الفريق.
الفريق يحتاج الى غربلة كبيرة ورحيل واعتزال البعض، والتعاقد مع لاعبين بمواصفات معينه، صغار فى السن، لديهم الطموح ولديهم الموهبة، ويستطيعون ارتداء تيشرت النادى.
جماعة الخير احنا نادى الزمالك، وغير مقبول شكل الفريق فى الموسم الماضى، ومش هنقعد نحتفل ببطولة كأس مصر ونقول احنا مش هنتسرع في الصفقات.
الاندية تبدأ فترات اعداد كما أسبوع استعداداً للموسم القادم اللى سيبدأ فى الاسبوع الاول من شهر أغسطس، فـ مفيش وقت، ومش لسه بدرى زى ما بيقولوا.. الموقف صعب، ومش لازم ننتظر لحد ما نلاقى بنتعاقد مع 3 أو 4 لاعبين قبل قفل باب القيد بدقائق.
محتاجين سرعة في التحرك، واختيارات جيدة سواء على جانب المدير الفنى أو جهازه المعاون أو اللاعبين، وتانى ويا بخت من بكانى وبكى عليا ولا ضحكنى وضحك الناس عليا، إحنا معندناش أحسن لاعبين فى مصر، الفريق محتاج شغلى على مدار فترتي القيد، ويكون فى خطة :بالاسماء" لغربلة الفريق، والتعاقد مع لاعبين مميزين، فى الصيف وفى شهر يناير.
يا جماعه احنا الزمالك، إحنا الزمالك، إحنا الزمالك، لازم اللى موجود يعرف قيمة الزمالك، وهذه كلمتنا لله.
