وجهت الإعلامية سهام صالح وهى مذيعة قناة الاهلى السابقة رسالة قوية ومباشرة للمسؤولين عن كرة القدم في مصر.
هذه الرسالة جاءت بعد الأداء المميز لنادي الهلال السعودي وفوزه على مانشيستر سيتي في كأس العالم للأندية.
وقالت سهام صالح عبر برنامجها التلفزيونى : الهلال يتعادل مع ريال مدريد ويتأهل لدور الـ16 ويفوز على مانشيستر سيتي، وبيتأهل لربع النهائي.. وإحنا لسه قاعدين بنتفرج!
لحد إمتى هنفضل نتفرج وكل العالم حوالينا بيتطور، وإحنا لسه مش عارفين هنلعب كأس السوبر إمتى، ولسه بنتكلم لحد امبارح عن الملف دا.
وتابعت : أنا بوجه كلامي لكل مسؤول عن الكرة في مصر.. نفسي أسأل كل واحد: مش غيرانين؟ .. كلنا كنا فرحانين الصبح بفوز الهلال لأنه فريق عربي واللي عمله دا إنجاز مش بس على مستوى النتيجة لكن في الأداء والروح والطموح.
بس خلونا نتخيل إن فريق مصري هو اللي عمل ده .. تخيلوا الجملة: فريق مصري يهزم مانشستر سيتي!.. ده مش عنوان تريند دي رسالة مدوية للعالم.
وشددت على أن الهلال قدّم ما لم يستطع الكثيرون تقديمه، وإحنا هنا بنقول عندنا أقوى دوري في إفريقيا لكن في الحقيقة إحنا لسه بنتخانق على صفقات وبنختلف على جدول وبيطلع قرار خصم نقاط وبعدين يتلغي ولسه بنغرق في أزمات قيد وتحكيم وخناقات داخل الأندية.
وتبقى كلمة : سهام صالح نسيت حاجة صغيرة أوى، إن نادى واحد بيتم مجاملته، كل حاجة بتبوظ بسببه، جداول مباريات تتغير، ولوائح قيد تتعدل، وتعديل اللوائح بالمزاج، كل الاستثنائات متاحة له هو وبس، طبيعى تكون دى النتيجة.
