ستظل ردود الأفعال لفترة على اعتزال محمود عبد الرازق شيكابالا لاعب وكابتن الزمالك.
علق أحمد حسام ميدو لاعب الزمالك السابق على قرار اعتزال محمود عبد الرازق شيكابالا لاعب الفريق، والذي أعلن عنه بالأمس.
القرار الذي أعلنه شيكابالا لا تزال وستظل ردود الأفعال تتواصل عليه لفترة ليعلق ميدو على هذا القرار.
وعبر صفحته الشخصية على موقع التواصل الاجتماعى إكس كتب ميدو معلقاً قائلاً :
شيكابالا مش زي أي لاعب عادي، لأنه ببساطة كان إنسان قبل ما يكون لاعب كرة، ربنا أنعم عليه بالموهبة الفطرية، ومعاها قلب طيب زي معظم أهلنا في أسوان.
محمود عبد الرازق أعرفه كويس جدا، صاحب جدع وراجل من صغره، ولما اتزاملت معاه في الملعب كان قيمة فنية نادر أنك تقابلها في الملاعب المصرية، ولما دربته سواء في الزمالك أو الإسماعيلي، كان لاعب فذ يقدر يقلب أي ماتش.
شيكابالا أتولد في مدرجات حلمي زامورا، وأتولد وعاش جوة نادي الزمالك واختار أنه يكون أسطورة، على مدار ٣٠ سنة لعب كورة في قطاع الناشئين والفريق الأول، وكما طريقه لحد ما أصبح كابتن تاريخي لنادي الزمالك.
موهبة شيكابالا كانت تؤهله يلعب في أكبر أندية العالم، لكن حتى لما في بعض الأوقات الحظ مكنش بيقف معاه والظروف تعانده، كان بيرجع لبيته الزمالك عشان يكمل معاه رحلته، ويفضل هو روح الزمالك.
في أوقات كتير كان الفريق مش في أحسن حالاته بس شيكابالا شايل الزمالك على كتفه، وحتى لما جة لاعيبة كويسة في وقت تاني، كان شيكابالا موجود كابتن بروح ميت عقبة بيدلهم على طريق البطولات ومنصات التتويج.
ودلوقتي بعد ما قرر يعلق حذاءه، ويحرمنا من متعة الفرجة على سحره في الملعب، مكانه الطبيعي الرجوع لمدرج التالتة يمين، ويتكتب أسمه بحروف من نور وسط أساطير الزمالك الكبار.
رحلتك دلوقتي كادر مميز للزمالك والبداية بردوا من المدرج زي ما بدأت من ٣٠ سنة يا ساحر.
