في تصريحات جديدة قوية من طارق يحيي نجم ومدرب الزمالك الأسبق أكد، أن مواقفه وتصريحاته تنبع من حرصه على مصلحة النادي فقط، نافيًا سعيه وراء أي مناصب أو مصالح شخصية.
وكان طارق يحيي قد تعرض لانتقادات كبيرة بسب هجومه على قرارات مجلس ادارة الزمالك مؤخرا بتعيين أشخاص من خارج النادي في مناصب حيوية.
طارق يحيي خرج للرد من خلال تصريحات اذاعية عبر إذاعة "أون سبورت إف إم"،
حيث تحدث: "الحاجات اللي اتكلمت فيها أصلًا مش كاريري.. أنا لا مدير كورة ولا إداري ولا عامل غرف خلع الملابس ولا أي منصب من دول، أنا بتكلم عن مصلحة النادي ومش مستفيد حاجة من الكلام ده."
وأبدى يحيى دعمه لـ جون إدوارد كمدير رياضي: "أنا ما عنديش اعتراض على تواجد جون إدوارد لأنه شخص فاهم في الحتة دي ومنصب المدير الرياضي وهنساند كلنا.
" لكنه استدرك: "لما حد يسألني على رأيك في تعيين مع احترامي عبد الناصر محمد أو غيره من خارج أبناء النادي.. لازم أقول رأيي بصراحة مش هكدب."
وهاجم يحيى من يطالبه بتغيير رأيه علنًا: "في ناس بتقولي اطلع قول حاجات على الشاشة عكس اللي جواك.. أنا بقول رأيي الحقيقي.. مش بنافق السوشيال ميديا."
وجه طارق يحيى تحديًا مباشرًا لمنتقديه الذين يلومونه على عدم حديثه في عهد المجالس السابقة.
حيث تحدث: "لما واحد يقولك انتوا ليه مكنتوش بتتكلموا أيام المجلس السابق… لأ حضرتك كنا بنتكلم أنت اللي مكنتش بتتكلم، إحنا كنا شغالين جوه النادي وكنا بنتكلم وكنا بنشتغل في هذه الأجواء غير المستقرة والمتوترة وكنا بنعترض على قرارات كتيرة.. حضرتك كنت فين؟"
واستطرد: "لما كنا نيجي نقول لحد تعالى اتكلم في القناة يقولك لا أنا البعبع هياكلني.. أنا كنت شغال مع البعبع وكنت عامل شغل الحمد لله.. أنا كنت جريء وبشتغل وبنجز حاجات للزمالك.. أنا عملت قطاع للناشئين لعشر سنين قدام وللأسف راح كله.
وتساؤل: فين أسامة فيصل وفين حسين فيصل وفين يوسف أسامة نبيه وفين حسام عبد المجيد وفين ماجد هاني وفين علاء .. وغيرهم أنا اللي مصعد كل الناس دي.
و ذكّر يحيى بإنجازاته مع النادي: "أنا حققت أعلى نتيجة لأي فريق مصري خارج القطر المصري في دوري أبطال أفريقيا.. كسبت فريق ديكاداها الصومالي 7-0.. حد هيقول لي دي المباراة اتنقلت لمصر.
هقول لك ما الزمالك خرج قبل كده من الفريق الإثيوبي في مصر والأهلي كذلك.. لكن تاريخيًا يقال أن الزمالك حقق رقم قياسي بالفوز 7-0 على ديكاداها خارج الأرض ودي أنا اللي عملتها واتكتبت في تاريخي."
واختتم طارق يحيى تصريحاته مؤكدًا: "أنا زملكاوي وبحب الزمالك وغيور على النادي وكلامي علشان الكيان لأن كيان أي نادي من جماهيره ورموزه."
