علق أحمد سليمان عضو مجلس إدارة نادي الزمالك، على صفقة انتقال أحمد سيد زيزو إلى النادي الأهلي
مؤكدًا أنها لم تكن مجرد مفاوضات عادية، بل نتيجة لتدخل مباشر من الإدارة الحمراء.
في تصريحات عبر قناة MBC مصر، قال سليمان:
"أنا قولت قبل كده لما كنت مسؤول عن ملف الكرة في الزمالك، جاتلي فرص أضم لاعيبة من الأهلي، لكن وقتها كنت شايف إن بعد زيارة الأهلي للزمالك لازم يبقى في هدنة، ومفيش حد يقرب من لاعيبة التاني".
وأضاف سليمان متهمًا بشكل صريح: أنا بقولها بصراحة، لولا تدخل إدارة الأهلي وتقويتهم لزيزو، مكنشي هيقدر يمشي من الزمالك بالشكل ده، وكان زمانه مجدد بأقل من الرقم اللي خده.
وتابع أن زيزو كان لديه عروض عربية كثيرة، ولكن "تدخل الأهلي هو اللي أنهى كل حاجة".
من جانبه، رد سيد عبدالحفيظ، مدير الكرة السابق بالأهلي، خلال نفس الحلقة قائلا "طب ما لو جات للزمالك فرصة يضم حمدي فتحي أو ديانج، مش كان هايضمه؟.
وأن رئيس الزمالك نفسه حسين لبيب قال قبل الانتخابات إنه لو عايز ياخد لاعب من الأهلي هاياخده".
ورد سليمان موضحًا: "كل التصريحات دي كانت قبل زيارة الأهلي للزمالك، وبعد الزيارة المفروض كل حاجة تتغير، وهي هدنة محترمة".
وأشار إلى أن الأهلي ضم إمام عاشور قبل عبد الله السعيد، وأن قصة عبد الله السعيد كانت قديمة قبل وجود نية حقيقية لتحسين العلاقة بين الناديين.
