علق أحمد حسام ميدو لاعب الزمالك السابق على قرار وزارة الإسكان بسحب أرض 6 أكتوبر من نادى الزمالك.
وزارة الإسكان قررت سحب أرض فرع النادي بمدينة 6 أكتوبر في خطوة تم وصفها من جانب نادى الزمالك وصفها بأنها مفاجئة وغير مبررة، لتتوالى ردود الأفعال.
وعبر صفحته الشخصية على موقع التواصل الاجتماعى إكس كتب ميدو معلقاً :
قبل ما أتكلم عن موضوع محاولة سحب قطعة الأرض المخصصة لنادي الزمالك لفرع 6 أكتوبر، تأكدت من صحة معلوماتي من أكثر من جهة، الزمالك أوراقه كلها سليمة ولسه دافع رسوم المزايا التي حصل عليه سواء بزيادة نسبة البناء أو زيادة عدد الأدوار في المباني والزمالك لسه مستلم خطاب بمد الفترة المسموح بها للانتهاء من المرحلة الأولى للمباني، وهي 30٪ من نسبة المباني.
الزمالك مستلم الأرض دي من 2004 ما حدش حط فيها مسمار وما حدش كان عنده مشكلة أبدا، ودلوقتي لما الزمالك ابتدى شغل وابتدى يتعاقد على 27 ملعب، وخلاص ابتدى يدخل منها فلوس وخلاص هيقف على رجله ومش محتاج دعم من حد وده اللي كل الزمالكاوية بيحلموا بيه بقالهم سنين، علشان نقدر ننافس وننتظم في دفع المستحقات للاعيبتنا وللموظفين في النادي، وأخيرًا هنستقر بعتوا الناس توقف الشغل وتسحب الأرض.
معايا كل الأوراق والمستندات اللي بتثبت ان كل إجراءات الزمالك صح، وبناشد المسؤولين بدعم الزمالك بالقانون وأن يضعوا أي شخص بيحارب النادي عند حده، وعندي ثقة كبيرة إن المسؤولين هيدعموا النادي، وإنهم عارفين مدى أهمية هذا المشروع بالنسبة لاستقرار النادي ومستقبله.
