علق المحلل الرياضى محمد ناصف على خبر إقراض هشام نصر نائب رئيس النادى مبلغ 20 مليون جنيه.
القرض قرض حسن من أجل دفع مستحقات اللاعبين المتاخرة، وهو الملف الذى يشغل بال الجميع فى النادى، لينتقد ناصف هذا الإحتفاء، مؤكداً أنه احتفاء غير مقبول.
وعبر صفحته الشخصية على موقع التواصل الاجتماعى فيس بوك كتب محمد ناصف منتقداً :
هو ايه اللي هشام نصر يقرض النادي 20 مليون جنية وهوبا شكرا يا هشام يا نصر
شكرًا بجد على ايه على انه نائب رئيس النادي واتصرف في التزامات النادي ودفعها سواء من جيبة ولا من جيب غيره متفرقش !!!
شكرًا على ايه ؟ على انه دفع الفلوس كقرض على النادي عشان يحل ازمة هو كنائب للرئيس مسئول عنها هو وكل الاعضاء الموجودة
بجد شكرًا على ايه ؟ عن انهم ادارة عشان تدفع مرتبات لاعيبة القدم شهرين تلاتة بيدفعوا من جيبهم قرض يدينوا بيه النادي اومال باقي الموسم هنعمل ايه
شكرًا على ايه ؟ما تقرض ياعم النادي ولا تدفع من جيبك من سكات هو لازم تقول انك قرضت النادي بيهم وتعرف الصحافة والاعلان كانك بتجبي عن النادي او شخص من خارج الادارة دافعهم للنادي مثلا
شكرا على ايه ؟ كامل ابو علي ومصيلحي وياسين منصور بيدفعوا للاندية اللي بيشجعوها وبيبنوا فرق وبيصرفوا عليهم مواسم كاملة من غير ما يحصل ازمة مالية واحنا نفضل نزنق في نفسنا والاسم رجال اعمال
مع احترامي لاي حد بيقول شكرا احنا ساندنا الناس دي ووقفنا في ضهرهم عشان رجال اعمال هييجوا يحلوا ازمات النادي ويدوروا على مصادر مالية نقدر من خلالها نخرج من الازمات المالية اللي عايشين فيها من سنين لكن للاسف كل سنة نفس القصص ونفس الموال والسنة اللي فاتت مشي جوزية جوميز افضل مدير فني بسبب نفس الازمة.
انا مليش دعوة بأرض انسحبت او بغيرها احنا بيديرنا ادارة كلها مليارديرات ولسه ممدوح عباس بيدفع وهما لما حد فيهم يدفع مبلغ يطلع يبلغ الصحافة كلها انه دفع ونفضل نقول شكرا يا فلان وشكرا يا علان وكأنهم بيعملوا حاجات خارقة مش مسئوليتهم اصلا كأدارة بتفيد النادي وخدوا منها الشهرة والصيت والدعم الكامل
كفايا شكرا عشان متحرجوش نفسكم تاني لما يحصل ازمة تانية ونرجع ندور على واحد منهم يدفع ويحل الازمة ويطلع يسيحلنا في الصحافة والاعلام كأنه عمل حاجة بطولية مش واجب عليه كضو مجلس ادارة صاحب قرار ومسئولية نادي عنده جماهير بالملايين
