أشاد الإعلامي خالد الغندور بالطفرة الكبيرة التي يحققها نادي بيراميدز خلال الموسم الحالي.
وأكد أن الفريق السماوى أصبح واحد من أبرز الأندية في القارة الإفريقية بعد تتويجه بعدة بطولات في فترة وجيزة.
وقال الغندور خلال تصريحات إذاعية : بيراميدز بيكتب تاريخ جديد للكرة المصرية، الفريق السنة دي بيكسب في كل البطولات اللي بيشارك فيها، فاز على نهضة بركان في السوبر بهدف في آخر نص ساعة، وحافظ على النتيجة لحد ما رفع الكأس.
وكسر القاعدة اللي كانت بتميل لبطل الكونفدرالية بعد آخر تتويج للأهلي بالسوبر سنة 2021.
وأضاف الغندور : بيراميدز كمان فاز بدوري الأبطال على صن داونز، والسوبر على نهضة بركان بطل المغرب والكونفدرالية، يعني بيتوّج على حساب الكبار.
الإنجاز ده مش بسيط، خصوصاً إنه بيحصل من فريق لسه بيبني تاريخه في قارة فيها عمالقة زَي الأهلي والزمالك.
وتابع مازحاً : بيراميدز المفروض ينافس الأهلي والزمالك في الأغاني! يعني الزمالك عنده (التالتة يمين)، والأهلي عنده أناشيده، طب فين أغنية بيراميدز؟ مش نادي مصري برضه؟.
بطولة بيراميدز دي تساوي عشرين بطولة للأهلي والزمالك، لأنه بيكسب من غير دعم إعلامي ولا جمهور ولا قناة خاصة، وبيلعب كل 3 أو 4 أيام بدون تأجيلات، وبرغم كده مكمل وبيفوز.
وأتم : هو كمان الفريق الوحيد اللي كسب الأهلي الموسم ده 2-0، وبسهولة، فبرافو بيراميدز.. والله تستحقوا كل التقدير والتصفيق.
