علق رحاب أبورجيلة عضو مجلس ادارة الزمالك السابق على السؤال المنتشر بعد سحب أرض النادى فى مدينة 6 أكتوبر.
السؤال هو .. ليه محدش عمل حاجة فى الارض طوال الـ 20 سنة الماضية، ليرد أبورجيلة ويعلق ويرد على هذا السؤال.
وعبر صفحته الشخصية على موقع التواصل الاجتماعى فيس بوك كتب رحاب أبورجيلة قائلاً :
هات ورقه وعد معاى عدد رؤساء مجالس ادارت ولجان بنادى الزمالك فى خلال العشرين سنه السابقين من سنه ٢٠٠٥ وعذرا لو حصل لخبطه فى الترتيب.
المستشار مرتضى المهندس رؤوف جاسر ثم المستشار مرتضى الاستاذ مرسي عطاالله الاستاذ ممدوح عباس الدكتور محمد عامر ثم الاستاذ ممدوح عباس المستشار جلال ابراهيم الدكتور كمال درويش ثم المستشار مرتضى وبعدين لجنه المستشار احمد البكرى وبعدين لجنه اللواء عماد ثم لجنه الكابتن حسين لبيب ثم المستشار مرتضى ثم لجنه الدكتور عماد البنانى ثم المجلس الحالى الكابتن حسين لبيب العدد كام ١٦ مجلس ولجنه.
٩٠% من المجالس دى اتحلت لعوار فى العمليه الانتخابيه اللى الجهه الاداريه هى اللى بتقوم على الاشراف عليها من وقت دعوه الانتخابات الى العمليه الانتخابيه نفسها اللى بنفاجأ كل مره ان فى غلط فى الاجراءات وبعدين حل المجلس المنتخب وتعين لجان والدايره اللى انتم حافظنها ويجى واحد قاعد زى الباشا يقولك معملتوش ليه حاجه فى الارض فى العشرين سنه اللى فاتت.
نرجع بقه لنقطه البوست بتاع امبارح ياعم انت خدت ارض ب ٣٠ مليون باسعار زمان وبعت فيها بأسعار دلوقتى المعلومه اللى ما ببتقلش ابدا ان وزاره الاسكان علشان توافق على زياده النسبه الاستثماريه وعمل لها مخرج للشارع اعاده تقيم الارض وباعت لى الجزء ده تانى ب ٨٠٠ مليون جنيه والزمالك دفع ٥% من المبلغ حاجه كده اسمها جديه تعاقد يعنى الزمالك شارى الارض ال ١٢٩ فدان ب٣٠ مليون وشارى ال ١٠% دول بس ب٨٠٠ مليون جنيه ....ودمتم
