تحدث محمد صبرى لاعب الزمالك السابق، ومقدم برنامج زملكاوى على شاشة قناة النادي عن استعدادات الفريق لمباراة الغد.
وأكد محمد صبرى على ثقته في قدرة الفريق على الفوز، لكنه علق على موقف قال أنه يستدعى التعليق.
وقال صبري : كنت مش ناوي أتكلم النهارده عن أي حاجة غير الزمالك ومباراة الغد، لكن امبارح تفاجئنا بأن أحد نجوم الأهلي السابقين الذي يقدم برنامج ذكر في الانترو أن بعض لاعبي الأهلي يحتاجون إلى حماية من جمهور الزمالك في مباراة الغد.
وأضاف : دي أول مرة أسمع إن لاعب كرة أو مقدم برامج يطلب حماية للاعب في مباراة ديربي! حماية من إيه؟ وإزاي؟ الماتش 11 ضد 11، والموضوع كله في الملعب، مش في المدرجات.
وتابع صبري : مش هطول دلوقتي لكن بعد المباراة ممكن أتكلم بالتفصيل.
اللي لازم أقوله إن جمهور الزمالك عمره ما يعمل حاجة خارجة عن حدود الأدب، دايماً بيروح المدرجات عشان يشجع فريقه فقط، جمهور محترم ومخلص، وكل همه يشوف فريقه يفرح ويرفع الكأس.
وأتم : جمهور الزمالك هيهتف فقط للاعبيه، ويدعم فريقه لحد آخر دقيقة، فـ مفيش داعي لأي حد يطلب حماية منه، لأن جمهور الزمالك أكبر من الكلام ده، وأي محاولة لتشويه صورته ستكون خاطئة.
