قام الاعلامى خالد الغندور، بنعى اسطوره الزمالك الاسبق محمد صبري، بأكثر منشور عبر حسابه الرسمى على موقع التواصل الاجتماعى :
وكتب: لغاية دلوقتي مش قادر استوعب انك مت خلاص ده انت اصغر مني ده انت كنت لسه معايا في البرنامج ده انت كنت عشرة العمر و الأيام الجميلة ده انت كنت لاعب فذ ده انت لاعب تاريخي في الزمالك ده انت جبت بطولات و فرحت جمهور الزمالك ده أنا صلحتلك اول هدف في حياتك و كان في الأهلي فاكر يا صبري و فاكر هدفك في الأفرو اسيوي اللي جاب بطولة فاكر ضحكنا هزارنا مع بعض فاكر كل أيامنا الجميلة و احنا لسه صغيرين بنحلم بفانلة الزمالك الله يرحمك يا حبيبي و يصبر اهلك و اولادك و يصبّرنا علي رحيلك الصعب و علي العموم انت مت يوم جمعة الناس كلها هتدعيلك في صلاة الجمعة .
وكتب خلال منشور آخر: ٣ أيام حداد على روح صاحبي الغالي وصديق العمر ورفيق الطريق
قل لي يا صبري
قل لي يا صاحبي..
إيه هو العمر
هل هو ايام وسنين بتمر
أوذكرى لطيفة ف القلب تسر
أو دمعة بتجري لو حزننا مُر
قل يا صاحبي.
قل يا صاحبي
بكرة تمام .. إحنا على ميعادنا
ولا خلاص .. الموت بعّدنا
ولا نرجع تاني نقسم في وجعنا
طاب كنت تقول .. ناوي تودعنا
دا العمر نسيج
وخيوطه بتكر
قل يا صاحبي
قل يا صاحبي
لساك فاكر يوم أول ماتش
ولا صاروخك من أول تتش
الملعب كله .. فرحان مقعدش
حتى اسمك طار للسما ولا عادش
والعمر تعيشه
طول عمرك حر
قل يا صبري
عيني ف عينك كدا تعلالي
عارف ليه اسمك ف العالي
مش حرفنتك بس يا غالي
ولا صواريخك بالنسبالي
قلبك وولاءك
ما في شيء بيغر
بص يا صبري
يا حبيب العمر
غيرتك ورجولتك إخلاصك
قلبك في الملعب وحماسك
عشقك للأبيض إحساسك
أما الجمهور .. دول ناسك
قل يا صاحبي
ايه هو العمر
مش بس ايام وسنين بتمر
كانت أحلام بخطينها الحمر
وهتفضل ذكرى في القلب تسر
وهتفضل صبري النجم الحر
هتفضل صبري النجم الحر
★★★★★
إنا لله وإنا إليه راجعون
ربنا يرحمك ويغفر لك
ويصبرنا ويصبر أسرتك وكل حبايبك
الحزن تقيل إوي يا عشرة العمر
لكننا مؤمنين بقضاء ربنا
