خرج الاعلامي أحمد عفيفي بكلمات تتحدث عن قيمة الراحل محمد صبري لاعب الزمالك السابق الذي رحل بالأمس عن دنيانا
وكتب أحمد عفيفي من خلال حسابه على موقع التواصل الاجتماعي فيسبوك قائلا:
في اول حلقة من فن وهندسة كنا محتاجين ضيف، كانت اول مرة اعمل برامج فيها ضيوف، انا كنت دايما بقوم بالحلقة لوحدي
فـ السؤال اللي كان بالنسبة لي وقتها صعب هو: مين يكون الضيف
ضيوف الحلقات الاولى في البرامج عادة بيكونوا النجوم الاكبر (بالمعايير الاعلامية) اللي وجودهم يعمل اكبر انتشار ممكن للحلقة، بس الحقيقة مكانش ده همّنا اوي، لا فريق الاعداد محمود فتحي واحمد سالم واحمد شوقي ولا انا
اختلفنا واحتارنا لكن الاسم اللي كلنا اتفقنا عليه هو محمد صبر
صبري وقتها بالمعايير الاعلامية والجماهيرية العامة مش اقوى ضيف، لأنه بعيد جدا عن الظهور وفيه جيل كامل مشافش صبري بيلعب اصلا
لكن بالمعايير الزملكاوية صبري كان افضل من يكون ضيف اول حلقة، وأي حلقة من برنامج مش عايز يقول انا اقوى وافخم برنامج لكن عايز يكون زملكاوي، مش زملكاوي الظاهر لكن او النسخة الزملكاوية المعتادة لكل اللي عايز يعمل برامج، لكن زملكاوي نسخة المشجع اللي كان بيهتم مين حضر تمرين النهاردة ومين لا،
مين في مشكلة مع مين واتحلت ولا لسه، الزملكاوي اللي فاكر جول ملوش لازمة في موسم ملوش لازمة واحتفل بيه في مدرجات ملعب الكلية الحربية في الشتا وسط ٢٥ واحد حوالي
المشكلة وقتها كانت الوصول لصبري، الراجل مبتعد ومش في دماغه الاضواء وبيعتذر عن اي شي وكل شي
احمد شوقي (كالعادة) قدر يوصل له واتفق معاه
وقتها كنت اعرف بس صبري اللاعب، صبري الانسان مكانش عندي اي تجربة معاه
لما وصل كان مفاجأة بالنسبة لي
صبري ميعرفش انه صبري، ميعرفش قد ايه هو معلم في قلوب الناس، وان لقطات صغيرة وصور قليلة بكواليتي التسعينات اقوى اثرًا في قلوب الناس من اي شي يبدو افخم لكن مش بنفس الاصالة
صبري بره الهوا وجوه الهوا كان مبسوط ومش شايف انه يستحق كل الحفاوة دي رغم اننا فعلا معملناش حاجة كبيرة
زي ما قلتلك .. مكانش يعرف انه صبري
في الوقت اللي اصحاب الاثر المتوسط او حتى اقل بيبالغوا في تقدير نفسهم واثرهم وما حققوه لدرجة تكرهك فيهم، بيأثر فيك دايما اصحاب الاثر الكبير اللي مش واخدين نفسهم بجدية ولا حاسين انهم عملوا حاجة، واللي لو بس حاولت تديهم جزء من حقهم بيبقوا شاكرين جدا احساسا منهم انهم ميستحقوش كل ده
رغم ان اللي سابوه من اثر في القلوب اقوى بكتير من الصور الهاي كواليتي والمحبة المصنوعة بلقطات متركبة مخصوص عشان تاخد قلبك
صبري كان له بريق طبيعي بشري لم يصنعه احد
اتمنى يكون عرف ده عن نفسه وحس واتبسط بكل الاثر اللي سابه
