تحدث المحلل الرياضى محمد ناصف عن تصريحات وزير الشباب والرياضة المستمرة بشأن نادى الزمالك.
تصريحات فى مجملها تبدو جيدة، لكنا فى النهاية لا تعدو كلمات روتينيه، ليتحدث محمد ناصف منتقداً الوزير.
وعبر صفحته الشخصية على موقع التواصل الاجتماعى فيس بوك كتب محمد ناصف قائلاً :
سيادة الوزير في كل مناسبة او مداخلة يقولنا تصريحات من نوعية مش هنسيب الزمالك وهندعمه والنادي لن ينهار ... من الجمل الاستهلاكية اللي مش عارف الواحد يضحك عليها ولا يحزن
تقريبا سيادة الوزير مخبيين عليه في الوزارة ان الزمالك فعليًا بينهار او انهار وان كلماته الاستهلاكية اللي بيقولها اصبحت مضحكة وملهاش قيمة لان فعليا انتوا سايبين الزمالك وفعليا الزمالك بينهار
بس انا بصراحة كمشجع عاصرت وجود الوزير وكان من اهم اسباب اللي وصله الزمالك وعمره ما حل مشكلة للزمالك بل بالعكس شارك في ازمات النادي وحل فعليا بس حل مجلس الادارة بدون سبب في فترة من اهم وافضل فترات النادي قبل النهائي الافريقي وشارك في القضاء على اهم جيل في كرة القدم صنعه الزمالك اخر 20 سنة ورجع المجلس بعد سنة ولحد دلوقتي الوزير نفسه معندوش اجابة واضحة لحل المجلس في 2020
وحاليا ارض النادي اتسحبت في عهده والنادي بيغرق وهو شاهد مشافش حاجة وكل ما حد يسأله يقولك اصل الموضوع في النيابة وهنديهم ارض بديلة
بصراحة سيادة الوزير المحسوب علينا زملكاوي هيكون اول وزير شاهد ومساهم بشكل كبير في القضاء على الزمالك واحد من اهم واعظم الاندية في مصر و افريقيا النادي اللي عنده جماهير بالملايين ودي نقطة هتخليه مكمل في منصبه فترة كبيرة اكتر من اللي تواجد فيها في الوزارة ...
بصراحة يستحق تحيه واشادة على دوره العظيم اللي مقدرش يعمله اي وزير سابق غيره حتى لو اهلاوي
