علق المحلل الرياضي محمد ناصف على بيان جون إدوارد المدير الرياضي لنادي الزمالك.
هذا البيان الصادر منذ ساعات والذى أوضح فيه إدوارد إن الدنيا سوداء في نادي الزمالك، حرص محمد ناصف التعليق على هذا البيان.
وعبر صفحته الشخصية على موقع التواصل الاجتماعي فيسبوك كتب محمد ناصف معلقاً،
بيان مفهوش اي جديد ومعاد ومكرر وكلنا عارفينه ومفيش حد يتنصل من المسئولية لانك قبلت وكملت في الظروف دي ومازلت مكمل ... طالما اشتغلت متطوع زي ما بتقول مع اني عارف ان محدش اشتغل في النادي متطوع وخير النادي عليكم ... ليه مقدمتش استقالتك ليه لما لقيت الوعود بتتبخر ومتحققش منها حاجة كملت ؟!
في اختيارات غلط انت مشارك فيها وفي عناد وتأخير في بعض الملفات منها ملف فيريرا واحمد عبد الرؤوف وطالما مكمل في ظل كل المشاكل دي وقابل بيها تبقى مدان مع الكل
احنا دفعنا عنك يا جون ودعمناك وروحت غيرت جلد الفريق كله بم فيهم عمال غرف الملابس وطبيب الفريق وحتى ملعب التدريبات وكلها حاجات كلفت النادي مبالغ كنا ممكن نوفرها في حاجات تانية اهم
في صفقات جت بمبالغ كبيرة حتى لو تقسيط لكن متلعبش زمالك وفي مدير فني ضعيف جدا تم التعاقد معاه وفضلت مصمم عليه لحد ما رجعنا خطوات كتير للخلف وفي واحد مؤقت كان جي يلعب السوبر المصري كمل لحد دلوقتي وضيعنا معاه وقت كبير
عموما الوضع في النادي معروف والدنيا وصلت لمرحلة صعبة بس طالما كملت متعفيش نفسك من المسئولية ... وكان المفروض تقدم استقالتك من بدري كانت النظرة ليك هتبقى مختلفة عن دلوقتي
دا رأي مع احترامي لاي رأي تاني
