علق المحلل الرياضي محمد ناصف على الخبر المنتشر بشأن رغبة نادى بيراميدز فى التعاقد مع ناصر ماهر لاعب الفريق الأول لكرة القدم بالنادى.
وعبر صفحته الشخصية على موقع التواصل الاجتماعى فيس بوك كتب محمد ناصف قائلاً :
شايف بوستات بتتكلم عن بيع ناصر ماهر صانع الألعاب الوحيد في الفريق والناس بتتعامل مع الخبر انه عادي وبيسعروا اللاعب كمان لبيراميدز عشان يشتريه على اساس ان المليون ونص دولار اللي بيتكلموا فيها هتسدد مستحقات لاعيبة او تجيب لاعيبة تانية او هتسدد الغرامات اللي علينا للفيفا
بؤس غريب من الناس وتفكيرهم في الاستغناء عن صانع اللعب الوحيد في ظل مستوى ادم عاديد وغياب احمد حمدي وعدم وجود صانع لعب مركز 10 في الفرقة كلها زي ناصر ماهر
فأحنا هنلجأ لبيع اللاعيبة المميزة عشان ندفع مرتبات اللاعيبة التعبانه اللي في الفرقة اللي بعد ما هنبيع اللاعيبة المميزة مش هنعرف ننافس على اي بطولة باللاعيبة التعبانه اللي هنسددلهم مرتباتهم من بيع اللاعيبة المميزة دا لو اصلا عرفنا نسدد
الناس بدل ما تضغط على الادارة وكل بوستاتها تتوجه ضد الادارة الفاشىلة اصبحوا حاليا بيساعدوا الادارة اكتر في تىدمير الزمالك اكتر ماهو مدمر
انا وانت مش قصتنا نحل مشاكل النادي ماديا لاننا مش اعضاء مجلس ادارة احنا كجمهور مهمتنا ندافع عن النادي ونتتقد الغلط ونهاجم المقصرين مش نديهم الفرصة انهم يبيعوا اللاعيبة المميزة اللي تسند الفرقة عشان تقدر تكمل وانت واقف على رجليك
الزمالك برغم اللي وصله الا انه مازال منافس على كل البطولات ومبعدش عن اي بطولة مشارك فيها الكونفدرالية والكأس والدوري وحتى كأس الرابطة لسه لينا فيها حظوظ دا غير التمسك باللعب في دوري الابطال الموسم القادم
اه الوضع صعب بس متسهلش على الادارة انها تمارس فشىلها وتبيع اللاعب المميز اللي من غيره احنا مش هنعرف ننافس على اي بطولة
سؤالي الاخير لكل واحد بيقول بيع تقدر تقولي بعد مانبيع اللاعبية المميزة هنقدر نكمل ازاي ؟ هنافس ازاي ؟ هل هتقبلوا اننا ننافس على وسط الجدول او مناطق الهبوط ؟ اسئلة قبل ما تفكر انك تقول نبيع اي لاعب مميز فكر فيها كويس وبعدين اطلع قول نبيع ولا منبعش
