وجة الاعلامى خالد الغندور، رساله الى نجوم المنتخب الوطنى الاول والجهاز الفنى، عبر حسابه الرسمى على موقع التواصل الاجتماعى "فيس بوك":
وكتب: شوفوا
هي البلد دي
مش فيها حاجة حلوة وبس
لا
دي فيها حاجات مختلفة
يا ترى اللي بيشككوا في إن المصريين مختلفين وحاجة تانية
أخبارهم إيه
مش حوار كورة وبس
خلينا في آخر خمسين سنة
العبور العظيم عكس كل توقعات العدو
وعكس توقعات العالم كله
فوز أربع مصريين ب نوبل
الفوز بكأس الأمم 5 مرات من وسط منتخبات إجمالي أسعار لاعبيها عشر أضعاف منتخبنا
صمودنا في قضية غزة وإنهاء الصراع بفضل الله ثم فضل زعيمنا اللي عارف حجمنا وحجم مصر كويس
فوزنا برئاسة اليونيسكو
المتحف الكبير وما أدراك ما حضارة المصريين
إحنا بس
أصحاب مزاج
أو زي ماتقول
شعب خلطته سرية
نسخة واحدة مش بتتكرر
تفتكره بعيد عن الإنجازات
لكن لا
چينات المصريين چينات حضارة
في ٩٨
الترشيحات طلعتنا ال ١٣
بس الجوهري ورجالته كان ليهم رأي تاني
في ٢٠٠٦
لا كان فيه ثقة في المنتخب ولا في المعلم حسن شحاته
واحتكرنا اللقب ٢٠٠٦ ، ٢٠٠٨ ، ٢٠١٠
عشان حسن شحاتة وولاده
يدخلوا تاريخ أساطير أفريقيا
ولغاية النهاردة هيفضل الجيل ده
من أهم أساطير القارة
نيجي بقى
للجيل الحالي
من كتر التشكيك والانتقادات المبالغ فيها
كنا خلاص هنفقد الثقة
فجأة وبدون أسباب
هجوم شرس متواصل على العميد
أسطورة مصر وأفريقيا التاريخية
حسام حسن
اللي يشكك في استحقاقه لمكانه
اللي يشكك في الاختيارات
اللي يقول لك ما واجهناش فرق كبيرة
يا جماعة
لما عدد مقاعد أفريقيا زاد ل ١٠ في كاس العالم
وعدد المشاركين في كاس الأمم زاد ل ٢٤
كان طبيعي تبقى التصفيات سهلة
ولا لازم حسام حسن يطلع نار من بقه
ونجيب له مجموعة تضم كوت ديفوار والكاميرون والسنغال والمغرب
وكأننا بنعيد نفس الغلط
فاكرين حسن شحاتة
المعلم حسن شحاتة
اتقطع أول ما مسك
دا مدرب المظاليم
دا عمره ما حقق بطولة
ولما البطولات بدأت تتحقق
دا محظوظ
دا بركة
دا مدرب حبيبي يا رسول الله
دا واخد لاعيبة جوزيه من الأهلي جاهزين
وكل ده ... صفر.. كذب
جوزيه ما عملش حاجة برا مصر
ولاعيبة الأهلي كان عددهم عادي
لا وكمان
دا الأهلي اللي كان بيشتري لاعيبة المنتخب
زي دلوقت مع زيزو وإمام مثلا
وبرضه العميد حسام حسن أول ما مسك
دا ما خدش بطولات
دا مجرد روح وحماس
دا محظوظ
دا ماشي بالبركة
والله إحنا اللي محظوظين في مصر
إن عندنا حسام وإبراهيم حسن
أساطير الكورة جوا الملعب وبرا الملعب
الراجل ده وزنه كوره
اتدرب على ايدين مدربين عظام وعلى رأسهم الجوهري وحسن شحاتة وفايتسا الألماني وفينجادا وكابرال
كل الشكر للجهاز الفني والطبي والإداري لمنتخب مصر
فرد فرد
كل الشكر للاعيبة
يا شناوي .. اجمد ما يهمكش
فيه غلطات.. بس أنت بخبراتك أدها وأدود
محمد هاني ... أنت محترم يا بني والله
بتبذل جهد فوق استطاعتك
وبتتحمل الانتقادات السخيفة برقي وصمت
ياسر إبراهيم .. رجولة وتركيز وإخلاص مالهمش مثيل
رامي ربيعة ... الخبرة كلها والروح القتالية والمعلمة والرؤية
حسام عبد المجيد...هايل وواثقين فيك
محمد حمدي .. ألف سلامة عليك يا بطل
أحمد فتوح .. كلنا عارفين امكانياتك وطمعانين في الأفضل
حمدي فتحي... في أفضل حالاته..وأحد أهم نجوم منتخب مصر في نسخة البطولة
مروان عطية راجل وتوج مجهوده بهدف تاريخي
زيزو ... أحسنت
تريزيجيه أحسنت
إبراهيم عادل.. أحسنت
إمام عاشور .. هااايل يا إمام ومن أهم نجوم ماتش كوت ديفوار
مصطفى محمد .. شابوه لك .. معجب جدا باحترافيتك وضبطك لنفسك
مرموش.. النجم الكبير وأحد أعظم لاعبي أفريقيا
روح ومهارة وحسم ودور كبير في البطولة
بصراحة كان الله في عون المدافعين:
لو جالكم مرموش
اياكم ماتخافوش
أما الأسطورة
كبير أسطوات الكورة المصرية والعربية والأفريقية محمد صلاح
فحدث ولا حرج
صلاح .. تخيلوا ... مو صلاح
ما بيسلمش من الانتقادات والمزايدات
دا صلاح بيلعب وهو خايف على نفسه
لا صحيح .. صلاح غلطان .. لازم ما يخافش على نفسه
ويتزحلق وتاكلينح ويطلع نار
دا صلاح بيلعب في ليڤربول غير هنا
الجملة دي منتهى الجهل
واللي بيقولها مالوش ذرة علاقة بالكورة
يا إخوانا عيييييب
اللي عندهم عشرة في الميه من صلاح
عاملينه أسطورة
وطالعين بيه سابع سما
عيب والله
صلاح
هو نجم نجوم الكورة المصرية بلا منازع
وتأثيره في الملعب خيالي
وضغطه النفسي على المنافس مرعب
ولو تلاحظو
المنافسين بيحاولوا يعملوا دعايات مضادة له قبل الماتشات المهمة
ودا معناه أد ايه هما مرعوبين ومضغوطين منه
وأبو مكة ما يتواصاش
مينتالتي .. عالمي.. خيالي
لا بينفعل
ولا بيرد
غير في الملعب
يكفيه ويكفينا لمستين تلاتة
بجول ..
بأسيسست
وفي كل ليل وفي كل صباح
في القلب مكانك دايما يا صلاح
وسواء حققنا اللقب
أو لا قدر الله لأ
شكرا من القلب
لكل رجالة مصر
