علق تامر عبد الحميد لاعب الزمالك السابق في الثمانينات على بيان المادي الأخير ضد الأخطاء التحكيمية في مباراة بيراميدز الأخيرة وضد موعد المباراة الذي تسبب في الخسارة بهدفين لهدف والخروج من البطولة.
تامر عبد الحميد يرى أن موقف ادارة الزمالك جاء متأخر بعد المباراة ما انتهت، وكان لابد أن يكون الموقف مبكرا.
وكتب تامر عبد الحميد من خلال حسابه على موقع التواصل الاجتماعي فيسبوك معلقا على البيان قائلا:
هو إنتوا بجد فاكرين الناس لسه بتصدقكم؟
إدارة بتشتغل رد فعل… مش فعل.
بتصحى بعد ما المركب غرقت..
** بتعترضوا على ميعاد ماتش بعد ما خلص!
**وتعيطوا على حكم بعد ما اتعيّن!
**وتصرخوا من لائحة إنتوا موافقين عليها وماضيين بإيدكم!
وتيجي تقولّي "حقوق الزمالك لن تضيع"؟✋️
أنهي حقوق؟
** غرامة كهربا راحت.
** الأرض راحت.
** قضية التلات نقط الأولى راحت.
** والتلات نقط التانية برده راحت.
وكل مرة تطلعوا تعملوا خطب حماسية وكأنكم في فتح الأندلس!📯
نكسب ماتش، تعملوا ملحمة وهمية، وتطلعوا أبطال من ورق، وتماثيل من عجوة تسيح مع أول خسارة.
ولما نخسر؟
المظلومية جاهزة… والشماعات متعلقة…مؤامرة كونية… لجان شغالة 24 ساعة تداري على الفشل… وتشيطن أي حد يقول الحقيقة.
و الفشل إداري واضح وضوح الشمس.
والمشكلة مش في حكم.
ولا في اتحاد.ومفيش مؤامرة.ومفيش كوكب متآمر.الحقيقة أن في إدارة ضعيفة… مرتبكة… منقسمة حتى على نفسها.قراراتها متأخرة… مواقفها مهزوزة… وكلامها أكبر من قدرتها.
الزمالك مش مسرح عرائس.
والجمهور مش كومبارس في فيلم بيانات.
الزمالك مش محتاج بيانات نارية بعد الكارثة.
الزمالك محتاج ناس تعرف تسبق الحدث… مش تلم بقاياه.
الجمهور تعب من التمثيل.
والشماعات خلصت.
