رد المحلل الرياضي خالد طلعت على تصريحات عدلي القيعي بالأمس التي تحدث فيها عن الحكم محمود وفا حكم مباراة الأهلي أمام سيراميكا.
وذلك عندما تحدث عدلي القيعي أن محمود وفا أكد لـ لاعب الأهلي محمود تريزيجيه "أنه متوصي"، في تلميح جديد ضد الحكم
وكتب خالد طلعت من خلال حسابه على موقع التواصل الاجتماعي فيسبوك قائلا:
في البداية المهندس عدلي القيعي بعتبره أخويا الكبير وعلاقتنا بيسودها الصداقة والاحترام والود من تقريبا 25 سنة ، وكان ليه فضل كبير عليا مقدرش أنكره سواء في بداية شغلي في الصحافة في 2002 في موقع في الجول أو في بداية شغلي في الاعلام في 2008 في قناة دريم سبورت
المهندس عدلي امبارح أكد ان محمود وفا قال لتريزيجيه في بداية الماتش انت متوصي عليك النهارده واعتبر ده تهديد ووعيد للاعب ، وقال ان حد بيثق فيه أكد له ان الكلام ده حصل
أولا أنا شفت الفيديو بنفسي ووفا قاله بالنص (في حد موصي عليك النهارده) واحنا هنا أمام احتمالين مالهمش تالت
الاحتمال الأول : ان الفيديو معمول بالـ AI وده احتمال كبير جدا لأن عن طريق الـ AI بيتعمل فيديوهات مقاربة للواقع متقدرش تفرقها
الاحتمال التاني : ان فيه حد فعلا كان موصي على تريزيجيه (توصية ايجابية مش سلبية) خاصة ان وفا وتريزيجيه الاتنين من محافظة واحدة (كفر الشيخ) فممكن حد ينتمي لنفس المحافظة قال لوفا كده (خلي بالك من تريزيجيه ده من كفر الشيخ زينا) ، ووفا قال كده لتريزيجيه عشان يطمنه ويلطف الاجواء قبل بداية الماتش ، وفي الحالة دي هيكون الكلام ده ليه معنى تاني خالص مختلف 180 درجة وعكس اللي قاله الكابتن عدلي
