أثار الكاتب الصحفي خالد طلعت غضب جمهور الأهلي عندما عمل احصائية لعدد لاعبي الأهلي المنتقلين الى الاسماعيلي خلال الأعوام السابقة وحققوا بطولت للأهلي وأثروا بالسلبي على الدراويش
وذلك على هامش هبوط فريق الاسماعيلي مؤخرا الى القسم الثاني لأول مرة منذ خمسينيات القرن الماضي
خالد طلعت من خلال حسابه على موقع التواصل الاجتماعي فيسبوك قائلا:
توضيح مهم جدا عشان اللي مش فاهمين يفهموا .. بعد لما نزلت بوست امبارح عن انتقال 20 نجم من الإسماعيلي للأهلي في الالفية التالتة وعمل صدى كبير جدا على السوشيال ميديا فوجئت بناس منزلة بوستات بترد عليا بأن اللاعيبة اللي لعبوا للأهلي وانتقلوا للاسماعيلي عددهم أكتر وبيضحكوا على جمهورهم الغلبان اللي بيصدقهم من غير ما يفكر ولا يراجع وراهم
عايز بس أفهمهم وافهم الجمهور ان الامور بتتقاس By Quality not Quantity وعشان لو مبيفهموش انجليزي الامور بتتقاس بالكيف وليس بالكم ، يعني مينفعش حد يدي لحد 100 دولار والتاني يديله الف جنيه واللي اداله بالجنيه يقوله انا اديتك اكتر لان انا اديتك الف وانت اديتني 100 لأن قيمة الدولار تقريبا 50 جنيه ، ومينفعش حد يدي لحد 10 تفاحات والتاني يديله 50 عنبايه ولا كريزه ويقوله انا اديتك اكتر عشان اديتلك 50 مش 10 لأن قيمة التفاحة الواحدة اكتر من قيمة 50 عنبايه
فيه فرق كبير جدا ، اللاعيبة اللي راحت من الاسماعيلي للاهلي راحوا وهما في عز مجدهم وتألقهم وراحوا نجوم كبار ووظهروا بمستوى رائع وصنعوا تاريخ للأهلي وجابوله بطولات كتيرة ، ورحيلهم عن الاسماعيلي اثر على الفريق بالسلب ، انما اللي راحوا من الاهلي للاسماعيلي راحوا ومستواهم الفني قليل جدا وراحوا لما الاهلي سابهم مجانا او عرضهم للبيع او تخلص منهم في صفقات تبادليه او كانوا ناشئين وماثبتوش نفسهم مع الفريق الأول او بعد لما كبروا في السن وشطبوا وقربوا يعتزلوا ، ولما راحوا الاسماعيلي مظهروش بمستوى مميز ومجابوش للفريق أي بطولة ، ورحيلهم عن الأهلي مأثرش عليه خالص بالسلب ، وبالتالي فيه فرق شاسع وكبير
هديكوا شوية أمثلة بالاسماء اللي راحوا من الاسماعيلي للاهلي نجوم كبار وعلامات زي محمد بركات واسلام الشاطر وسيد معوض وخالد بيبو وعماد النحاس وأحمد فتحي وعبد الله السعيد وعمرو السولية وأحمد حجازي وشريف عبد الفضيل ، وبعض اللي راحو من الاهلي للاسماعيلي أمثال أسامه عباس وأحمد رجب ومحمد شرف وأحمد سراج ومحمود شيكو ومصطفى عفروتو واحمد العش ورامي عادل ومحمد ماندو وعمر رضوان ومصطفى طلعت ومحمد خلف ومحمد فيليكس !!!!
استقيموا يرحمكم الله
