وجه الناقد الرياضي خالد كلعت مناشدات هامة في ظلالتراشقات الأخيرة التي تحدث بين جماهير الأهلي والزمالك خاصة عقب أزمة تصريحات عصام الحضري وأحمد السيد زيزو المتبادلة.
خاصة وأن الأحداث جاءت في يوم مناسبة دينية وهو يوم عرفة بالأمس.
وكتب خالد طلعت من خلال حسابه على موقع التواصل الاجتماعي فيسبوك قائلا:
امبارح كان يوم مهم جدا عند ربنا سبحانه وتعالى وهو يوم عرفة اللي المفروض الناس بتتقرب فيه من ربنا أكتر ولكن للأسف معظم الشعب المصري (المهتمين بالكورة) أخدوا فيه ذنوب كتيرة جدا على بوستاتهم على الفيسوك ، على حاجة تافهه وهايفة وهي التصريحات المتبادلة بين عصام الحضري وزيزو
للأسف الشديد الجماهير في اي مشكلة بين طرفين، مبقتش بتفكر او تشوف مين اللي غلطان وتنتقده وتشوف مين المجني عليه وتدافع عنه ، لاء بقت تاخد الموضوع بالانتماء وبالالوان ، لو واحد اهلاوي اختلف مع واحد زملكاوي ، يبقى كل الاهلاوية يدافعوا عن الاهلاوي ويشتموا في الزملكاوي ، وكل الزملكاوية يعملوا العكس ، والمشكلة ان ده مبقاش من الجمهور بس لاء ده كمان بقى من اعلاميين وصحفيين وناس بتطلع على الشاشات تتكلم
قال رسول الله صلى الله عليه وسلم (انصر اخاك ظالما او مظلوما ، قيل وكيف أنصره ظالما ، قال ترده (تمنعه) عن الظلم"
الموضوع في مصر بقى مختلف ، وكأن الناس دي مش هتتحاسب يوم القيامة وفي القبر ، وكأن الأهلي و الزمالك عندهم بقى أهم من ربنا سبحانه وتعالى ومن الالتزام بالاخلاق وتعاليم الاديان السماوية
تحصل مشكلة بين وليد سليمان وامام عاشور كل الاهلاوية يبقوا مع وليد وكل الزملكاوية مع امام ، والاهلاوية يهاجموا امام وينتقدوه والزملكاوية يدافعوا عنه ، بعد كام سنه امام يروح الاهلي اي غلطة يعملها وخصوصا لو كانت ضد الزمالك زي موضوع الاحتفال بالبالونه البيضا مثلا، الزملكاوية يهاجموه والاهلاوية يدافعوا عنه ، نفس الكلام لزيزو لما كان في الزمالك كانوا الاهلاوية بيقولوا بالونه ومبيعرفش يلعب ومالوش غير في ضربات الجزاء والزملكاوية بيقولوا نجم كبير ، ولما راح الاهلي الاراء اختلفت 180 درجة واتبدلت !!
ودلوقتي كل الاهلاوية ببدافعوا عن زيزو ويهاجموا الحضري والزملكاوية بيعملوا العكس طبعا لانهم مش بيحبوا زيزو من ساعة لما راح الاهلي
الناس بقت بتحكم على المواقف مش من التصرف نفسه ولكن مين اللي عمل التصرف لو اللي عمله بينتمي لنفس النادي بتاعي هدافع عنه ولو من النادي المنافس هشتمه ، ولو نفس التصرف بالظبط صدر من شخص تاني هيكون رد فعلي مختلف لو لون تي شيرت الشخص ده مختلف !!!
نرجع لقصة الحضري وزيزو انا شايف ان الاتنين غلطوا ، الحضري غلط الاول لما قال ان زيزو مينفعش ينضم للمنتخب رغم ان زيزو لاعب كبير وتألق في ماتشين السعودية وأسبانيا وانا شخصيا شايف ان تراجع مستوى زيزو وعدد كبير من لاعبي الاهلي راجع لسوء مستوى المدير الفني ومش عارف يوظفهم والدليل ان نفس اللاعيبه بتتألق وتكسر الدنيا في المنتخب مع حسام حسن ، وزيزو كمان غلط غلطة اكبر لما قال ان عصام الحضري بيقول كده عشان يتشاف ويعمل مشاهدات لان الحضري نجم كبير وليه تاريخ ، وزيزو اصغر منه بكتير وكان لازم يحترمه ويرد رد افضل من كده ويقول ان ده رأيه مثلا وانا هرد في الملعب ، ورجع الحضري غلط اكتر لما وصف زيزو بوصف غير لائق ممكن الجمهور المتعصب يقوله لكن مينفعش نجم كبير يقوله على لاعب في منتخب مصر
انا شايف كمان ان الغلطه الاكبر مش من زيزو ولا الحضري ومحدش اتكلم فيها خالص ، ولكن الغلطة الاكبر من سيف زاهر اللي عرض لزيزو تصريحات الحضري وطلب رأيه وطبعا اكيد اي حد مكان زيزو ممكن يتنرفز ويرد بشكل مش كويس وتحصل مشكلة زي ما حصل ، رغم ان سيف دايما مذيع هادي ورزين ومش بيدخل في السكه دي خالص لكن معرفش ليه غلط الغلطة دي المرة دي ودايما بيقولوا غلطة الشاطر بألف ، وممكن تكون الغلطة من فريق الاعداد بتاعه لكن هو اللي يشيل المسؤولية خاصة وان حلقة زيزو كانت مسجلة مش على الهوا وبالتالي كان ممكن الجزء ده يتحذف قبل اذاعتها
استقيموا يرحمكم الله ، عشان ولا زيزو ولا الحضري ، ولا الأهلي ولا الزمالك هينفعوكوا يوم القيامة
