كشف الاعلامى كريم أبو حسين تفاصيل حل ازمة المغربي صلاح مصدق، مدافع الزمالك الاسبق.
ونشر عبر حسابه الرسمى على موقع التواصل الاجتماعى "فيس بوك":
وكتب: ركز بقى معايا شوية عشان الجمهور بردو هو إللي حل مصيبة مصدق اه والله زي ما بقولك كده
وقبل ما أسرد التفاصيل
صلاح مصدق قال بالحرف الواحد :"لا كنتي همضي ولا هقبل تسوية ولا هحل الأزمة لولا خاطر عيون جمهور الزمالك
صلاح مصدق لشريف صفوت وعبدالرحمن إسماعيل: أنا مضيت بس عشان خاطر جمهور الزمالك
شكرا صلاح مصدق شكرا جمهور الزمالك صاحب الفضل و الملحمة
المهم والتفاصيل بقى :
شريف صفوت بحكم علاقته الأسرية مع مصدق أتفق مع المجلس إنه يسافر يخلص موضوع صلاح مصدق عشان هم الاتنين أصدقاء جدا وشريف قريب أوي من مصدق لدرجة إنه كان هيرجعه الزمالك قبل القضية والخلافات -ما علينا- وإدارة الكرة فرضت عبدالرحمن إسماعيل للسفر مع شريف يخلصوا الموضوع سوا.
الاتنين سافروا قعدوا مع اللاعب مع وكلاء اللاعب في المغرب عزيز الشافعي ومحمد خرزي ومتابع معاهم الدكتور سالم ووقف القعدة مع اللاعب
كان عدد من مجلس الإدارة مجتمع كابتن حسين لبيب وكابتن هشام نصر وكابتن حسين السيد وهاني بيرزي وعمرو الادهم اللي له دور هقوله دلوقتي
المهم تم الاتفاق بين شريف صفوت مع مصدق ووكلائه في المغرب علي توقيع تسوية وجدولة وإنهاء الموضوع وديا وإرسالها للفيفا وإرسال ايميل لمحكمة كاس باللي تم رسميا
واللي حصل كالتالي:
١- حصول صلاح مصدق علي ٤٠٤ ألف دولار تم تحويلها بالفعل
٢- حصول وكلاء اللاعب علي ٨٠ ألف دولار تم تحويلهم بالفعل
٣-المجلس حول الفلوس قبل التوقيع من جانب اللاعب لإبداء حسن النية والجدية.
٤- عمرو الأدهم لعب دور مهم في موضوع التحويل من خلال البنك اللي تم الساعة ٦ مساءا بعد مواعيد العمل الرسمية بساعة وده أمر طبيعي لاستكمال عملية تحويل بدأت من بدري
٥- صلاح مصدق هيحصل علي ٤٠٠ ألف دولار المتبقيين يوم ٣٠ يوليو المقبل.
٦- صلاح مصدق هيبعت للفيفا وكاس هذه التسوية بعد توقيعها رسميا وهيخطرهم بإنتهاء أزمته مع الزمالك
٧-هيتم إرسال ايميل رسمي من نادي الزمالك للمحكمة الرياضية كاس بالتسوية وحصول اللاعب علي مستحقاته وتسوية الأمور رسميا لتدعيم موقف النادي في تعليق عقوبة إيقاف القيد التأديبي لفترتين.
٨- المجلس تسلم صورة التوقيع علي التسوية ووجه الشكر لشريف صفوت وعبدالرحمن
٩-صلاح مصدق احتمال ينزل بوست لجمهور الزمالك .
١٠-في اتنين لاعيبه آخريين هيتم حل قضيتهم بالكتير أوي يوم السبت المقبل .
وفد الزمالك شريف وعبدالرحمن النهاردة في مدينة طنجة المغربية لإنهاء أزمة عبدالحميد معالي وتم الاتفاق مبدئيا علي التسوية ويبقي فقط تحويل الدولارات علما إن جزء من مستحقات معالي موجودة بالفعل وهتتحول بعد الاتفاق النهاردة ولو تم هعلن لكم رسميا التفاصيل
أتمنى وأدعوا الله إن التسويات وإنهاء القضايا ده يعضد ويدعم موقف الزمالك في المحكمة الرياضية كاس وإن كنت أشك في موضوع إلغاء عقوبة إيقاف القيد التأديبي بس ممكن يقلله فترة واحدة أو يعلقه مؤقتا فنعمل صفقات في الصيف ده بإذن الله ولو حتي اتعاقبنا في يناير بمنع القيد ساعتها مش هتفرق قولوا يارب
شكرا جمهور الزمالك
شكرا شريف صفوت
شكرا عبدالرحمن اسماعيل
نلتقي بعد الفاصل
