علق الاعلامى خالد الغندور، على تعادل المنتخب الوطنى الاول مع نظيره بلجيكا، فى اولى مواجهات الفراعنه فى كأس العالم.
ونشر عبر حسابه الرسمى على موقع التواصل الاجتماعى "فيس بوك":
وكتب: المصريين أهمه
حيوية وعزم وهمة
افرحوا يا مصريين
افرحوا
بس وأنتم رافعين راسكم
عندكم منتخب رجالة
جهاز فني ولاعبين
كانوا أدها وأدود
إحنا فرحانين بالأداء الرجولي البطولي في الماتش
وزعلانين على النتيجة
زعلانين إن بلچيكا هي اللي اتعادلت معانا وبالعافية
دايما هيفضل المصري
هو فنان الحضارة
صنايعي الفنون
وساعة الجد تلاقيه بقى مارد
بيخرج قدرات أكبر بكتير من المتوقع منه
امبارح مثلا
محمد هاني
قدم أفضل نسخة منه
لغى وجود أفضل جناح في العالم
إمام عاشور
رجل المباراة
مصطفى شوبير .. بطل
أداء ملحمي من كل المنتخب المصري
وسقف طموحنا اترفع يا حسام
وانتهت من قاموسنا يا عميد
جملة التمثيل المشرف
الفرحة امبارح كانت فروع نور
مزينة مصر بطول وعرضها
بطول النيل وعرض البحر وعمق الواحات
ومن الدلتا للصعيد لسينا
هو نفس الچين
چين العظمة
عظمة المصري الفنان الصبور
اللي نحت الصخر فنطق وقال ابو الهول ورمسيس
وعلم الحجر يكون الكرنك والأهرامات
هو نفس چين العظمة
اللي عبر الكنال
وغلب المحال
عارفين قيمة الفرحة
إنها بتجمعنا على قلب راجل واحد
من ريسنا البطل لأصغر طفل في الوطن
من الجندي للفلاح
من الصياد للدكتور
من نسخة ولاد ايچيبت لنسخة ولاد البلد
الكورة بترجعنا وبتجمعنا
امبارح مثلا
كان فيه شبان متجمعين في أشيك وأغلى كافيهات
وفي نفس الوقت
كان فيه عسكري في أبعد نقطة سهران والراديو على ودنه
أمهات كتير مالهمش في الكورة قاعدين وسط ولادهم يدعو ومتحمسات جدا جدا
ممكن يكون فيه مصريين مالهمش في الكورة
بس مستحيل تلاقي مصريين
مالهمش في مصر
شكرا حسام حسن
شكرا لجهازك الفني
اتحملت نقد كتير
واتغيرت كتير
وأدرت المباراة بمنتهى العظمة والهدوء
مش أي مدرب يقدر يستبعد لاعب بحجم مصطفى محمد
ولا أي مدرب يقدر يكتشف نجم زي زيكو ويراهن عليه
ولا أي مدرب يدفع بشاب 18 سنة زي حمزة عبد الكريم اللي اختيارك ليه بيقدم موهبة لمصر، وبيدعم ابننا الشاب في البارسا ويكبره
ولا أي مدرب يقدر يقعد نجم زي نريزيحيه
ولا أي مدرب يقدر يقنع عملاق زي الشناوي إنه يقعد احتياطي
ولا أي مدرب مصري أو أجنبي يقدر بسهولة إنه يغير مو صلاح نجم العالم مش نجم مصر وبس
كل الدعم ليك يا عميد
مصر في ضهرك
وتحيا مصر
تحيا مصر
تحيا مصر
