علق الناقد الرياضى محمد الجبالي، على مقترح هانى ابو ريدة رئيس مجلس اداره اتحاد الكره المصري.
ونشر عبر حسابه الرسمى على موقع التواصل الاجتماعى "فيس بوك":
وكتب: بالدليل القاطع .. مقترح هاني أبو ريدة يدمر بطولة الدوري المصري علشان خاطر يراضي الأهلي ..!!
من غير دوشة وكلام كتير وهري وهبد .. تعالي معايا بعقلك نتكلم في شوية نقاط مهمة جداً بعيداً عن الانتماءات بخصوص البيان الذي صدر من اتحاد الكرة والذي يؤكد بأن هاني أبو ريدة طلب من الكاف وموتوسيبي زيادة عدد الأندية المصرية وبعض الدول الأخرى المشاركة في البطولات الأفريقية في الموسم الجديد ...
أولاً : قصة إنك تغير لائحة بطولة قارية قبل بدايتها بشهر هذا هو قمة الفساد الإداري وضرب لقاعدة إحترام اللوائح في مقتل ...
ثانياً : قصة إنك عايز 6 فرق مصرية تشارك في البطولات الأفريقية في هذا التوقيت فهذا معناه إنك بتبوظ بطولة الدوري المحلي .. طاب إزاي ؟ مفيش حد في مصر ميعرفش إن الدوري المصري مازال استثنائي حتى الموسم المقبل .. ومفيش حد ميعرفش إن مشاركة الأندية المصرية في البطولات الأفريقية مع الأجندة الدولية للمنتخب دايما بتتسبب في أزمات لبطولة الدوري .. ومفيش حد ميعرفش إن مواعيد 4 فرق مشاركة في دوري استثنائي هتكون مختلفة تماما عن مواعيد 6 فرق .. الخناقات كانت ليل نهار بسبب مواعيد مباريات أفريقيا وانت عندك 4 فرق مشاركين .. فما بالك لو 6 فرق مع دوري استثنائي .. لا هتلاقي وقت للدوري ولا هتلاقي وقت لـ ال6 فرق ولا هتلاقي وقت للمنتخب .. وبدل ما بتخلص في شهر 5 زي ما حصل لأول مرة في الموسم المنقضي هتلاقي نفسك رجعت زي العشوائية بتاعة زمان وممكن توصل لشهر 8 ....... يعني الطبيعي والمنطقي يكون هدفك الدوري المحلي كرئيس اتحاد كرة علشان يجي الموسم بعد القادم وترجع بطولتك زي ما كانت طبيعية فيها 18 نادي فقط ..!!
ثالثاً : إدعاء بأن الشركات الراعية هي اللي طلبت ولزوم التسويق .. كلام فاضي .. لأن رعاة الكاف هما هما في جميع البطولات وبيتم التوقيع معاهم كل 4 سنوات .. يعني الاعلانات اللي بتشوفها في مباريات دوري الأبطال هي اللي بتشوفها في الكونفدرالية ... ولو الرعاة هما اللي هيتحكموا في مين يشارك ومين ميشاركش مكنش ايطاليا موصلتش لكأس العالم ومكنتش البرازيل وألمانيا خرجوا من البطولة الحالية ..
رابعاً : اللي بيقولك الزمالك متضرر .. عايز أفهم هو متضرر في ايه ؟ الزمالك كده كده مشارك في دوري الأبطال بصفته بطل الدوري وصاحب المركز الأول .. ولا هيفرق معاه يشارك الأهلي ولا ميشاركش .. المتضرر هو الدوري المصري وضرب اللوائح في مقتل ..!!
خامساً : في الدوري الاستثنائي اللي ماشي به في مصر لقينا الأهلي وبيراميدز في الموسم الماضي خرجوا من دوري أبطال أفريقيا ومكملوش ،، يعني دوري استثنائي وفيه ناديين وخرجوا .. عايز تخليهم 3 ولسه برضوه دوري استثنائي ..!! أين العقل والمنطق ؟!
سادساً : إذن توقيت البيان الصادر من هاني أبو ريدة غريب جدا .. وتحليلي إما أنه للتغطية على أزمة مباراة الأرجنتين اللي مش عارف يجيب حق مصر فيها أو إنه يريد غسل يديه من الصداع اللي شغال عليه بسبب حصول الأهلي على المركز الثالث وعدم رغبتة في المشاركة في الكونفدرالية .. والمؤكد من وجهة نظري أن أبو ريده عارف القرار اللي هيتاخد من دلوقتي مش لسه لما يجتمع المكتب التنفيذي .. فلو تمت الموافقة قول على الدوري المصري في الموسم الجديد مع السلامة يا صاحبي .. ولو تم الرفض هيقول أنا عملت اللي عليا علشان يرتاح من الصداع ..!!
سابعاً وأخيراً ... المنطق والعقل ومصلحة الكرة المصرية أن يقاتل أبو ريدة لتطبيق هذا المقترح بدءا من الموسم بعد المقبل حتى لا يضرب اللوائح في مقتل وايضا حتى يكون الدوري المصري عاد لوضعة الطبيعي بدلا من الاستثنائي وحتى تكون جميع الفرق على معرفة بوضعها من بداية الموسم بدلا من تغيير اللائحة قبل البطولة بشهر في واقعة تحدث لأول مرة في تاريخ أي اتحاد قاري ... !!
