علق الكاتب الصحفي خالد طلعت على الجدل التحكيم الحالي بعد أول جولتين من مسابقة الدوري
حيث طالب خالد طلعت بالاهتمام أولا بالتصوير التلفزيوني والاخراج وتطويره قبل الاهتمام بتطوير التحكيم
وكتب خالد طلعت من خلال حسابه على موقع التواصل الاجتماعي فيسبوك قائلا:
حاجة مهمة جدا كمان في موضوع التحكيم واهم من التحكيم نفسه وأخطاء الحكام وهي التصوير التلفزيوني
مينفعش نبقى في سنة 2026 والتصوير عندنا زي فت ومعندناش زوايا واضحة تبين الالعاب بشكل واضح عشان نقدر نحكم عليها كم عادل سواء النقاد او الجمهور او حتى حكام الفار في الملعب
لقطة ضربة جزاء بن شرقي في ماتش انبي مكانتش واضحة وكنت شايفها في الاول مش ضربة جزاء بكاميرا التلفزيون ، ولكن لما شفتها من زاوية عكسية متصورة من المدرجات اتأكدت انها ضربة جزاء لأن فيه دفعة من مدافع انبي
لقطة بن شرقي في ماتش زد اللي طالب فيها لاعبي زد بضربة جزاء ، اقسم بالله انها مش واضحة بالنسبة لي لحد دلوقتي ومقدرش احكم عليها حكم نهائي لان زاوية التصوير سيئة جدا وبعيدة ومن الخلف ومفيش زاوية واضحة قريبة من قدام ، وعشان كده متكلمتش عنها لاني مينفعش اقول رأي مش متأكد منه
حتى هدف الاهلي التاني في لقطات مبينه ان زيزو تسلل ولقطات تانية مبينة انه متغطي بمدافع زد يعني برضه مش واضحه ومتقدرش تحكم عليها بشكل قاطع
لازم قبل ما نهتم بالتحكيم وتطويره نهتم بالتصوير التلفزيوني والاخراج وتطويره لان لو التصوير كويس وواضح هيساعد حكام الفار انهم ياخدوا قرارات سليمة وعادلة
