كشفت الناقدة الرياضية ملك موسي عن الموقف بخصوص لاعب الفريق الشاب يوسف وائل فرنسي فى ظل الحديث عن تجديد عقده.
ملك موسي تحدثت عن المعاناة التى يعانى منها اللاعب والظروف التى يعيشها.
وعبر صفحتها الشخصية على موقع التواصل الاجتماعى فيس بوك كتبت متحدثه :
قبل ما تتكلموا عن إن يوسف وائل فرنسي مش عايز يجدد للزمالك.. جاوبوا الأول على سؤال السكن!
يوسف مالوش سكن في القاهرة، ومع ذلك بيسافر كل يوم من طنطا للقاهرة عشان يحضر تدريب الزمالك ويرجع تاني.. يوم ورا يوم، سفر وطريق وإرهاق، واللاعب ساكت وما اشتكاش.
طيب ليه؟!
اللاعب كان ليه سكن بالفعل، وسكن بتكلفة بسيطة جدًا في إمبابة، لكن تم إخراجه منه.
ليه ما اتوفرش له سكن قريب من مكان تدريباته زي باقي لاعيبة الزمالك؟!
هل المطلوب إن لاعب شاب ملتزم، بيحضر تدريباته، وبيؤدي واجبه تجاه ناديه، يفضل كل يوم رايح جاي من طنطا للقاهرة؟
ولو لا قدر الله حصل له حادث في الطريق.. مين هيتحمل المسؤولية؟!
وبعدين نستغرب إنه تعبان أو مستاء؟!
الأغرب إن النادي بيتكلم عن التجديد للاعب، وفي نفس الوقت اللاعب مش موفر له أبسط حقوقه من سكن واستقرار، وبيتم استبعاده من القائمة وخارج الحسابات بدون أسباب واضحة.
يوسف فرنسي لم يطلب المستحيل.. هو لاعب شاب أثبت التزامه، وكان موجود وقت ما الزمالك احتاجه، ومتمسك بالاستمرار داخل النادي، ورفض عروضًا من الخارج لأنه يريد الزمالك.
فبدل ما نعمل حملات عليه ونصوره للجمهور على إنه "مش عايز يجدد"، قولوا الحقيقة كاملة.
اللاعب عايز يجدد.. لكن من حقه يطلب عقدًا يليق به وبما قدمه، ومن حقه يعيش ويتدرب في ظروف آدمية، ومن حقه يتعامل زي باقي لاعيبة الفريق.
يا مجلس إدارة الزمالك.. قبل ما تحاسبوا اللاعب على مطالبه، حاسبوا نفسكم:
ليه يوسف فرنسي بيتعامل بالشكل ده؟ وليه مش زي باقي اللاعبين؟
الزمالك لا يكسب أبناءه بكسرهم أو تشويههم..
الزمالك يكسب أبناءه بالعدل والتقدير.
