فتح مرتضى منصور رئيس الزمالك النار على الوايت نايتس، بعدما أصدر الأخير بيانًا يدين فيه فتح عضويات مستثناة لرجال الشرطة والقضاء.
وقال منصور: "يابنى خليك فى حالك، مش انت اللى تقولى آخد عضوية لمين، ومش أى عيل هيطير بيان على الإنترنت ده كلام فارغ، وأنا مسئول مع مجلس إدارتى أدام الجمعية العمومية اللى من حقها تحاسبنى".
وأوضح أنه فتح باب العضويات المستثناة لرجال الشرطة والقضاء والصحفيين والجيش والنيابة العامة، وأن القرار مطابق للائحة وهدفه جلب حوالى 20 أو 30 مليون جنيه تمكن المجلس من إبرام صفقات جديدة لتحقيق البطولات التى يطلبها الجمهور.
وأضاف: "حضرتك زعلان وهتقعد تئرفنى، هقولك تقول لبابى يجيب من مصروفك علشان عاوزين نشترى لاعب"، مُكملًا: "ممنوع عيل يتدخل فى شغل مجلس إدارة نادى الزمالك".
وواصل: "أى حد هيعمل بيانات هيبقى مكانه فى صفيحة الزبالة، وانت مش هتيجى تعلمنى يابن إمبارح إيه اللى أعمله، اللى يحاسبنى الجمعية العمومية والأجهزة الرقابية".
وشدد على أن مجلس الزمالك لن يتراجع عن قرار يتخذه، وأنه لايخشى أحدًا ولن يهتز أمام الضغوط، مُختتمًا: "مش كل 5 دقايق شوية عيال هتقعد تئرفنا، أنا لو رئيس جمهورية كنت قفلت النت فى 24 ساعة".
