قررنا فى "الزمالك اليوم" نعمل تحليل فنى لماتش الزمالك وفيتا كلوب فى الجولة الأولى بدور الـ8 الأفريقى باللغة العامية البسيطة:
فى مشهد كربونى اتكرر مليار مرة فى السنين الأخيرة، الزمالك يفرط فى تعادل على الأقل أمام فيتا كلوب، ويرفض إنه يخرج بنقطة، ويهدى المنافس الـ3 نقط !!
لازم نعترف إن ميدو كان خايف من فيتا، ولعب بطريقة دفاعية، ودى البصمة اللى سابها محمود الجوهرى الله يرحمه فى كل واحد اتدرب تحت قيادته للأسف!!!.
ميدو نزّل حماده طلبة وإسلام عوض اللى هما مش موجودين من شهوووور فى ماتش قوى زى فيتا كلوب، يعنى من الآخر سلم الاتنين دول تسليم أهالى للجمهور، لإن اللاعيبة اللى فى نفس ظروفهم أما بيلعبوا ماتش زى ده بعد غياب بيبقى أدامهم حاجتين، يا إما يتألقوا ويبقوا أساطير، أو يظهروا بالشكل اللى ظهروا بيه والجمهور يدبحهم.
ميدو بدأ بنزعة دفاعية ولعب على التعادل وده اتنقل للاعيبته، بدليل إنه لعب بتشكيل مفيهوش لاعب واحد فى الهجوم يصنع الفارق، جعفر عاوز الكورة فى الصندوق ويخلّص، مش دوره إنه يرقص أو يعمل ثرو مثلًا!!، إسلام لبس تيشيرت الزمالك نسى الكورة أصلًا!!!، ومؤمن مش هيقدر يقوم بالدور ده.
نزول إسلام تحديدًا كان غلطة جسيمة من ميدو لعدة أسباب: أولًا: مفيش أى انسجام بينه وبين عبدالشافى، وكان كل واحد فيهم بيلعب لوحده، ده لو فرضنا إن إسلام لعب أصلًا .. ثانيًا: إسلام مش قادر يثبت نفسه فى الدورى .. تلاعبه فى أفريقيا ؟!.
أما بالنسبة لمؤمن، فالراجل تألق أما لعب خط وسط على الدائرة، لإنه لاعب بدنى على أعلى مستوى وعنده رؤيه يقدر يبنيلك هجمه، وده بيمثل 70% من مستواه، أما الـ30% الباقيين، دول الإضافة بتاعته، ترقيصه، جون براسه أو رجله، لكن أما يبقى ده الدور الأساسى بتاعه مش هيقدر يعمله زى ما المدرب عاوزه، بالظبط زى ماكان حلمى طولان بيطلب منه كده ومكانش بيقدر.
كان طبيعى الزمالك ميظهرش ليه أى أنياب هجومية طالما بنلعب بنزعة دفاعية وهدفنا التعادل، وطبيعى طالما هدفنا التعادل نخسر، لكن اللى مش طبيعى إن ميدو يستنى 45 دقيقة وهو سايب محمد إبراهيم وحازم إمام على الدكة، وطلبة وعوض فى الملعب وهو بيتفرج !!!.
رغم الطريقة الدفاعية للزمالك إلا إن خط الدفاع كان بيلعب متأخر لحد قوس منطقة الـ18، وده زود المساحات اللى مفروض نص الملعب يغطيها + إن لاعيبة الزمالك كانت مخضوضة لحد مادخل فينا الجون الأول.
فيتا مبذلش مجهود كبير، كان مجرد إنه يلعب الطويلة فى قلب دفاع الزمالك، وفرق السرعة كان كفيل إنه يحسم أى كورة للاعيبة بطل الكونغو، مع الضغط على لاعيبة الزمالك فى كل شبر فى الملعب، لكن رغم كده عندهم جون "صيده" وخط دفاعهم ضعيف !!.
فى الشوط الثانى ميدو أخيرًا خد باله وطلع إسلام وطلبة ونزل حازم وإبراهيم، بالعكس كان جرئ جدًا وبعدها بشوية نزل أوباما بدل نور السيد، ميدو كان طالع فى الماتش بمنظرين، فارق كبير فى إدارته للماتش فى الشوط الأول عنه فى التانى.
عبدالشافى هو كمان كان طالع بمنظرين، اتسبب فى جون .. وشال جون، وفى كل الأحوال الراجل ده رصيده فى قلوب جماهير الزمالك أكبر من غلطة فى ماتش
بعد التغييرات الزمالك اتحسن واتحكم فى رتم الماتش وضغط وبدأ يبقى فى انطلاقات حازم على اليمين وعبدالشافى على الشمال ووجود إبراهيم فى قلب الملعب خلاه بيوزع اللعب كويس، وقدرنا الحمدلله نجيب جول حلو أى لمؤمن زكريا.
بعد الجون الطبيعى تكون الكورة تحت رجلينا ونمتص الاندفاع اللى هيبقى عند فيتا، لكن إحنا كررنا مشهد فى ماتشات كتير، أهمها نهائى كأس مصر مع إنبى بعد ماجبنا الجون فكينا راحوا اتعادلوا فكينا زيادة كسبوا!!!!.
فيتا اتقدم على الزمالك بعد 4 دقايق فقط من جون مؤمن زكريا، نقطة مهمة لازم يقف ميدو عندها مرة واتنين، بعد الجون بتاعنا لازم نكون أهدى ونلعب بثقة أكبر، لإنك لو جايب الجون بعد تقدم الخصم بجون أو اتنين ده معناه إنك اتعادلت أو قللت فرق الأهداف وقربت من التعادل أو الفوز، ولو جبت جون تقدم على المنافس يعنى إنت كسبان، وفى كل الحالات دى المفروض نجيب الجون ونهدى ونسيب الخصم يتعصب براحته !!.
مكناش نتمنى نخسر لأسباب كتير، لكن اللى حصل حصل، عندنا ماتش الهلال يوم السبت، أى نتيجة لاقدر الله غير المكسب، هتعنى ببساطة إن الزمالك بيعمل "ريبلاى" لمشاركاته السيئة فى دور الـ8 البطولتين اللى فاتوا.
