مكانش من السهل إن فى زملكاوى واحد يتوقع نهاية مشوار ميدو
مع الزمالك بالشكل ده، بالعكس من أول دقيقة مسك فيها الفريق، وكل
الزملكاوية كانوا شايفينه رافع كأس بطولة.
وبدورنا فى موقع "الزمالك اليوم"، ننشر 5 أسباب وصلتنا للى إحنا فيه دلوقتى:
- إقالة هشام يكن وطارق السيد وحماده أنور:
مكانش متوقع إن ميدو يطلب إنهم يمشوا فى الوقت اللى مشيوا فيه، فى عز ما الفرقة فرحانة بالصعود للدورة الرباعية بعد الفوز على الشرطة، والغريب إن ميدو كان بيقود الفريق بنجاح فى أفريقيا والدورى فى وجود هشام وطارق وحماده .. يبقى إيه اللى خلاك فجأة تقرر إنهم يمشوا ؟!!.
المشكلة مش فى إن ميدو طلب إنهم يمشوا، لا العجيب إنك كمان جبت حد حوالى 95% من الزملكاوية إن مكانوش كلهم ميعرفوهوش أساسًا وهو محمد عويس، وده خلى فى شبهة مجاملات فى الاختيارات.
- تدخل المجلس:
فكرة إن المجلس يتدخل ويعين محمد صلاح وعبدالحليم على مع احترامنا الكبير جدًا ليهم، لكن القرار فى النهاية مكانش طالع من ميدو اللى هو مدير فنى ومسئول عن كل شئ يخص كرة القدم، والأغرب إن الراجل وافق إن عبدالرحيم محمد وأحمد عبدالحليم يمشوا، نتفق أو نختلف على دورهم، لكن إزاى ميدو يقول محدش يجرؤ يتدخل فى اختصاصاتى، وبعدين يوافق على قرار من مجلس الإدارة ليه علاقة بأمور فنية ؟!!!.
- الصفقات:
من أكبر الأخطاء اللى ارتكبها مجلس الإدارة، مكانش ينفع أبدًا تعلن عن صفقاتك سواء قوية أو ضعيفة قبل نهاية السيزون بتاعك، لإن باختصار أما لاعيب يكتر عليه الكلام إنه هيمشى، هيقول عليا وعلى أعدائى ويلعب وحش ويضيع الدنيا !!!.
- تناقض ميدو فى تصريحاته:
ميدو بعد ماتش الأهلى خرج وقال إنه فخور بإنه مدرب للاعيبة دى، وبعد ماتش سموحة قال إنهم مينفعش ينافسوا على البطولات، طب إيه ؟!!!!!.
- سوء إدارة ميدو للماتشات الكبيرة:
خلال مسيرته مع الزمالك تقريبًا فى كل ماتش حاسم ومع منافس مباشر، دايمًا ميدو مش بيختار تشكيلة صح، وبيحاول يعمل إضافات فنية زيادة عن اللزوم، والشئ اللى يزيد عن حده ينقلب ضده !!.
ملاحظة: الأسباب دى خاصة بميدو، لإن مينفعش نتكلم على مستوى لاعيبة، مفيش كلمات فى المعجم ممكن توصف !!
