نجح الزمالك إنه يفوز على حرس الحدود 1/0 فى دور الـ8 لكأس مصر.
فوز الزمالك جه كالعادة بعد مادمنا نشف، مش لأنه جه فى آخر 5 دقايق، لكن لأن قبل جون الزمالك بدقيقة واحدة الحرس ضيع انفراد يادوب الكورة حفت فى العارضة وخرجت بره، ولو كانت دخلت كانت هتخش فى قلوبنا!!.
الزمالك بدأ بتشكيل مكون من أبوجبل وأدامه من اليمين عمر جابر وصلاح سليمان وحماده طلبة ومحمد عبدالشافى، مؤمن زكريا وأحمد توفيق فى وسط الملعب، أدامهم أوباما ومحمود خالد شيكا، تحت راسين حربة محمد عبدالمجيد وأحمد على.
بشكل عام عبدالمجيد وشيكا إدوا الزمالك حيوية وسرعة أكبر، شيكا تحديدًا لو لقى حد يشغّله بلغة الكورة ويديله كورة فى مساحات هتبقى خطورته أكبر لإنه لاعب خطير أما بييجى من تحت، أما عبدالمجيد فده مشروع مهاجم ممتاز بس محتاج وقت وصبر على مايستوى على رأى كابتن بكر.
الزمالك ضغط على الحرس كويس أوى لكن هجماته مع خطورتها كانت قليلة، وده سببه إن الفريق مكانش فيه صانع ألعاب يوصل المهاجمين والأطراف للجون، بالإضافة إلى أن العرضيات من الطرفين كانت قليلة وده عمل نوع من الفقر الهجومى للفريق.
أكبر دليل إن الزمالك كان ناقصه صانع لعب إن لما مصطفى فتحى نزل قدر يجيب جول، ويمكن ميدو أدرك المشكلة دى كويس، وعلشان كده أخد محمد إبراهيم لقائمة ماتش دجلة، مهما كان عندك عضلات بس من غير عقل ملهاش لازمة !!.
القدر كان رحيم بميدو إن الزمالك كسب الماتش، خصوصًا بعد اختراع الدفع بعرفة السيد اللى مش بيشارك من شهور طويلة بدل أحمد على، أعتقد كانت المشانق هتتعلق لميدو وعرفة لو مكانش الزمالك كسب.
- حاجة بقى بخصوص عدم إذاعة الماتش: إنتوا لما مش بتذيعوا ماتش للزمالك مش بتحرمونا من مجرد ماتش كورة فى 22 واحد بيجروا ورا الكورة ويتخانقوا عليها، إنتوا بتحرمونا من النفس، إحنا بنتنفس زمالك، الزمالك ده الأوكسجين اللى إحنا بيه عايشين، وماتشات الكورة أولى من المسلسلات إياها يا عصام باشا يا "أمير" !!!!.
