بعد فوز الزمالك بالكأس الزملكاوية اتفاجئوا إن ميدو كان عاوز يمشى هو جهازه يعنى علشان يرفع الحرج عن مجلس الإدارة ويديهم حرية اختيار جهاز جديد أو الإبقاء عليه لو هما عاوزين.
وكالعادة إحنا فى "الزمالك اليوم" هدفنا مصلحة الزمالك مش أى شخص، ولقينا إن قرار استمرار ميدو أفضل لـ3 أسباب:
1 - ضيق الوقت: الزمالك خد الكاس يوم السبت اللى فات، وعنده ماتش مصيرى مع مازيمبى السبت اللى بعده، يعنى الوقت ميسمحش لأى مدرب جديد ييجى ويطبق فكره ويحط بصمته مع الفرقة، وسبحان الله .. فييرا جبناه الزمالك من سنتين قبل ماتش مع مازيمبى برضو فى الكلية الحربية بـ6 أيام، وده كان أول ماتش الزمالك يخسره من فريق أفريقى فى القاهرة !!.
2 - بطولة الكأس: طبيعى فى أى فرقة بعد ماتكسب بطولة، الروح المعنوية للجهاز واللاعيبة بتبقى فى السما، خصوصًا بعد مشوار صعب أو بعد ماتاخد البطولة من خصم قوى، لإن ده بيخليك انت تحس إنك مش قليل، والطبيعى كمان بعد ما أى فرقة تكسب بطولة إن العلاقة بتزيد قوة بين المدرب ولاعيبته، وبالتالى لازم نستغل دفعة الكأس قبل ماتش مازيمبى.
3 - الصفقات: صفقات الزمالك "معظمها" ميدو اللى اختارها، وبالتالى إنت لما تجيب مدرب جديد وأجنبى تحديدًا على الصفقات دى مش هيقولك الله ده انتوا جبتوا لاعيبة هايلة، ده ممكن يفاجئك ويقولك أنا مش عاوز حد من اللى انتوا هتمشوهم يمشى أصلًا !!، وساعتها تلبس إنت فى الحيط بقى وتحاول تشوفلك صرفة فى لاعيبة جبتها وملعبتش !!.
