عشان تكون فريق كبير تقيل رخم يصعب هزيمته في اي ملعب و تحت اي ظروف في امور فنية و امور غير فنية وانا هنا عايز اتكلم عن بعض الأمور غير الفنية شوية لأنها بتنقص الزمالك حاليا اكتر من اي شيء تاني.
في مباراة ريال مدريد و اتليتيكو مدريد في الفينثينتي كالديرون بدأ الريال الماتش بداية سيئة و اتأخر بهدفين في اول 16 دقيقة .. لا اهتزت ثقتهم بنفسهم ولا ركبهم خبطت في بعض ولا شوحوا لبعض في الملعب .. راموس بعد كل كورة كان بيكلم زمايله و يأكد لهم ما معناه ان الموضوع سهل و هيعدي و احنا ريال مدريد .. قال كده و كان اول واحد بيقاتل في الملعب عشان يثبت ده بالتالي اللاعيبه سهل تصدقه و تاخد دفعة من كلامه .. استعادوا بسرعة سيطرتهم على نفسهم و قبل نهاية الشوط الأول كانوا سجلوا جول ايسكو بمهارة بنزيما و قتلوا الأمل في نفوس اتليتيكو.
في مباراة ريال مدريد و يوفنتوس في كارديف و رغم السمعة التاريخية عن قوة الطليان و جرينتا الطليان و صور كيليني رابط دماغه وهو بينزف و بتاع الا ان لاعيبة الريال كانوا اكثر خشونة و قوة و انتصروا في معظم الكرات المشتركة .. حتى في الوقت اللي مكانوش فيه كويسين فنيا في الشوط الأول كانوا الأكثر قوة و اندفاع.
ريال مدريد سجل هدفه الأول و هو الطرف الأسوء في الجيم و لما بقى الطرف الأقوى سجل هدفين و خلص النهائي و بعد ما خلص مسابش الملعب ليوفنتوس برضه و فضل مسيطر على مقاليد الأمور و كان اقرب للتسجيل الى ان سجل فعلا الرابع قبل النهاية.
دي كلها حاجات ملهاش علاقة بالفنيات لكن ليها علاقة بشخصية البطل اللي من غيرها الفنيات (اللي الكلام عنها يطول) تنصفك في ماتش و تخذلك في عشرة.
