اي انسان مهما بلغت درجة ذكائه لو بص وراه شوية على قراراته و اختياراته السابقة هيلاقي نفسه عك كتير وأساء التقدير والفهم والتصرف اكتر .. الفكرة ان العقل هنا (لو كان في عقل) المفروض يتعلم من المواقف دي و يفرملك لما يلاقيك ماشي بأقصى سرعة تجاه اي شيء .. بينورلك نور احمر و يقولك خد بالك لا تكون بتعك زي ما عكيت قبل كده
في ناس العقل بيتحول عندهم لحبل مكتفهم و مخوفهم ياخدوا اي قرار في اي اتجاه ودول بيقال عليهم مترددين .. غلطانين .. انت متقدرش تمنع نفسك من الخطأ مهما كنت حريص فمفيش معنى انك تقتل حياتك خوفا من ارتكاب اخطاء .. اغلط و اتعلم و صحح و اغلط تاني و هكذا .. العالم لم يكتشف حتى الآن طريقة افضل من دي للحياة لأنك لا هتقدر تمنع نفسك من الخطأ و لا هينفع تفضل واقف مكانك خوفا من الحركة لا تفشل.
على الجانب الآخر في ناس مبيبصوش وراهم اصلا و عندهم قدرة على تبرير اي مصيبة بيرتكبوها بإن الخطأ كان في الآخرين .. الناس دول سايقين على 180 و العربية مهما تتقلب بيهم بيدخلوا المستشفى و يخرجوا منها يركبوا نفس العربية و يسوقوا على 280 عادي جدا .. عندهم ثقة مطلقة عمياء ان العربية لا يمكن تتقلب تاني .. و لو اتقلبت فـ العيب في الفرامل او الطريق او العربية اللي جنبهم او حالة الطقس .. الخطأ في اي شيء الا قراراتهم هما .. الناس دول لو جمعوا بعض في جزيرة ما واستوطنوها وقرروا ينصبوا منهم رمز يقتدوا بيه و يسيروا على خطاه لن يجدوا افضل من مرتضى منصور.
