|
فى لقاء تليفزيونى مع
الإعلامى خالد الغندور فى برنامج " الرياضة اليوم " الذى يُقدمه على قناة
دريم 1 , تطرق حسام وصفى والد أحمد حسام ميدو مهاجم الزمالك لعدة أمور خاصة
بنجله تتلخص فى الآتى :-
- عيب إبنى يمشى بالطريقة دى , لإنه علامة من علامات نادى الزمالك والكرة المصرية , ميدو إحتراف فى أوروبا وهو عنده 16 سنة ولعب أول ماتش دولى مع منتخب مصر وهو عنده 17 سنة وبعديها سمير زاهر قعده فى البيت 5 سنين بعد 2006 , وميدوهو أشهر لاعب عربى فى أوروبا أما بينزل مطار أى بلد كل الناس عارفاه وده اللى زود الكره والحقد , وشهرته دى عاملاله مشاكل مع ناس معينة .
- أما كان حسن شحاتة ماسك منتخب الناشئين وكان كل لاعيبته من سن ميدو وكانوا بيشوفوه فى التليفزيون , ولما طلب شحاتة من الجوهرى مدرب المنتخب وقتها إنه ياخد ميدو معاه فى كأس العالم فى الإمارات الجوهرى رفض , وهنا إبتدى شحاتة يحس إنه رافض ينضم للناشئين بعد ما لعب فى المنتخب الأول وإنه بيتعالى على زمايله واللى زود الموضوع ده ناس بتهدى النفوس , وموضوع 2006 بدأ أما كان فى ماتش ودى أدام ليبيا وكان ميدو مُتألق وجاب جون وشحاتة خرّجه , وهنا بدأت نظرية الحب والكرة بين الطرفين , المدرب لو عاوز يبلع للاعيب الزلط هيبلعله .
- لولا ميدو موجود مع شيكابالا كان زمان شيكا مشى , ميدو مُحتضنه لإنه شايفه لاعيب موهوب ولازم يحترف فى أوروبا , وفى حد وصل شيكابالا لإنه يعمل كده مع حسن شحاتة , وشيكابالا ممكن تلفه فى جيبك لو بتحبه , وهو مكانش مبسوط مع شحاتة .
- ميدو مهمل فى حتة الوزن ولو عاوز يخس هيخس فى أسبوعين لكن مفيش حافز ومفيش مساندة من المدرب , حتى لو اللاعيب وزنه زايد سنة والمدرب عاوز يرجعه هيرجعه ويوقفه على رجليه تانى , لكن المدرب أما بيحب يفطس لاعيب بيفطسه وبيكرهه فى الكورة .
- حتى لو ميدو خس ورجع لوزنه الطبيعى مش هيلعب كورة فى الزمالك طول ما حسن شحاتة موجود , وهو إشترط فى جلسته مع الجناينى واللواء صبرى سراج أن الجهاز يكون عاوزة فى الفريق وهما قالوله أكيد , ومجلس الإدارة اللى معرفش يقيده أما رجع لازم يتحبس دى جناية .
- حسن شحاتة أول ما مسك المنتخب كان دون المستوى , لكن دلوقتى بقى عنده خبرات كبيرة , وأول ما مسك منتخب مصر كان معاه لاعيبة مش هتتكرر , وكانت سياسة الدولة مساعداه فى إنها تشغل الناس بالكورة , والإعلام كان وراه , وهو مبروك .
- أكتر ناس بتحب نادى الزمالك فى الفترة الحالية هما حسام حسن وإبراهيم حسن وأحمد حسام ميدو وشيكابالا ! .
شاهد الفيديوهات
|
