شن الإعلامى سيف زاهر هجوم كبير على حسام عاشور، لاعب الأهلى "المغضوب عليه".
وقال سيف زاهر : حسام عاشور خرج من الباب الصغير وباع تاريخه من أجل المال .
وأضاف سيف زاهر عبر برنامجه الاذاعى : كفاية يا عاشور لعب بالورق، خرجت من الباب الصغير وخسرت كل حاجة، لو عايز نصيحة يا تقول حاجة كويسة يا تسكت.
وواصل سيف : ابعد عن الأهلى ومتتكلمش عن النادى تانى، رصيدك نفد يا عاشور، مش معمول عليك حملة زى ماقولت، ده شعور جمهور كبير حبك وكرهك بفضل تصرفاتك.
وتابع : لازم أعتذر لجمهور الأهلى لأنه كان صح فى أزمة حسام عاشور، كنت بخرج أدافع عنه وأقول للجمهور بلاش قسوة، وبشويش على الكابتن التاريخى، حتى الزمالك كان محترم فى الأزمة ورفض تسريبات عاشور أن الابيض، يفاوضه وقالوا مش عايزين مزايدة من اللاعب .
واكمل سيف هجومه العنبف على عاشور قائلاً : عاشور لاعب باع ناديه وتاريخه عشان الفلوس، تاريخه راح ورصيده راح، التاريخ يحسب بالالتزام وبالأخلاق وبحب الكيان، أنا أهلاوى بس بتكلم كإعلامى، الأهلى فوق رأس جميع محبيه بس واضح أن الفلوس هى الأساس.
وأوضح : عاشور مقالش جملة واحدة صح فى كلامه، وانا مش من المقربين من الخطيب حتى أدافع عنه ولكن برىء تماماً فى أزمة عاشور .
وشدد على أن الخطيب ومجلس اداراته عملوا لعاشور اللى متعملش فى تاريخ الأهلى، عماد متعب قد حسام عاشور 100 مرة وطلب من مجلس الأهلى مباراة اعتزال، الكابتن الخطيب قاله مش بنعمل مباريات بنشارك بس .
وأشار الى أن كلام عاشور وهجومه على الأهلى لن يؤثر فى تاريخ الاهلى، لأن جمهور الأهلى كان على حق فى أزمة عاشور، ولو اللاعب عنده جرأة يخرج يتكلم ويقول الحقيقة ويقول إنه طلب من الخطيب 20 مليون جنيه حتى لو مش هيلعب، وطلب يستمر سنتين فى الأهلى وياخد الـ 20 مليون حتى لو مش هيلعب رغم أن بقاله سنة محطش رجله فى الملعب، إذن عاشور كان عايز يكمل بدون لعب عشان ياخد 20 مليون جنيه يعنى عشان الفلوس.
وأكمل : بيقول دلوقتى أنا قادر العب وعندى عروض، فين العروض دى ياعاشور كان لازم تحترم تاريخك ولو عايز تكمل تلعب فى أى نادى تانى حقك بس بدون ماتغلط فى النادى اللى صنع نجوميتك وتاريخك وشهرك .
وختم : عاشور عارف أنه مش هيلعب كورة تانى وعايز الأهلى يكافئه بـ20 مليون جنيه، وخارج يقول أنا طول عمرى ساكت لأ أنت مش ساكت أنت عملت ملايين وتاريخ بسبب الاهلى، فى ناس عندها صبر وولاء وانتماء ولم تتجاوز مخدتش ربع اللى انت خدته .
وتبقى كلمة : السؤال هنا هو لو الموقف دا فى الزمالك كانت هتبقى الحماسه دى موجوده ، وفى اعتذار للجمهور الابيض.
